Над 350 уапсени во Турција во операција против „Исламска држава“

Вкупно 357 осомничени лица се уапсени низ цела Турција како дел од операцијата против терористичката група „Исламска држава“, објавија турските медиумите.

Во објава на турската социјална платформа NSosyal, министерот за внатрешни работи Али Јерликаја изјави дека стотици осомничени лица се приведени за време на истовремени антитерористички операции во 21 провинција.

Според него, акциите ги спроведоа регионалните полициски одделенија во координација со главните обвинителства, како и со единицата за борба против тероризмот и разузнавањето на полицијата. Министерот подвлече дека Турција нема да покаже никаква толеранција кон тероризмот.

Претходно, Главното обвинителство на Истанбул објави дека во метрополата се уапсени 110 лица. Според обвинителството, 41 од нив биле поврзани со терористи, учествувале во нападот во провинцијата Јалова на 29 декември и планирале слични напади во Истанбул за време на новогодишните празници.

Од своја страна, Генералното обвинителство на Анкара објави дека издало налози за апсење на 17 осомничени членови на Исламска држава, вклучувајќи 11 странски државјани.

Осомничените, меѓу кои и 11 странци, се обвинети за членство во терористичка организација и одржување контакти со воени конфликтни зони.

Според обвинителството, одделот за истрага на терористички злосторства ги идентификувал осомничените преку анализа на дигитални материјали запленети за време на претходни истраги поврзани со „Исламска држава“.