Пресврт во црногорската секс афера: Кривична пријава против Пајковиќ

Управа на полицијата отвори нова фаза во аферата што со денови ја тресе Црна Гора: против Мирјана Пајковиќ е поднесена кривична пријава поради сомнение за кривично дело „принуда“, на штета на Дејан Вукшиќ, поранешен директор на Агенцијата за национална безбедност (АНБ) и безбедносен советник на претседателот Јаков Милатовиќ.

Според полициското соопштение, на 10 октомври 2024 година, без согласност на Вукшиќ, Пајковиќ наводно го земала неговиот мобилен телефон и од уредот испраќала навредливи фотографии и пораки до лица што му се познати, создавајќи впечаток дека тие содржини ги испраќа самиот тој. Потоа, по телефонски контакт меѓу двајцата, таа наводно тајно го аудио-снимила разговорот, со намера материјалот подоцна да го искористи како средство за притисок.

Клучниот момент, според истата верзија на полицијата, е 20 март 2025 година: снимката наводно му била испратена на Вукшиќ преку апликација за комуникација, со заканувачки тон и „изрично барање“ да се откаже од кандидатурата за судија во Уставниот суд. Пријавата, како што се наведува, Вукшиќ ја поднел кон крајот на март 2025 година, а сега, по преземени полициско-обвинителски дејствија, Основното државно обвинителство во Подгорица било известено и е поднесена кривична пријава.

Ова доаѓа по неколкунеделниот јавен и политички „шум“ околу објавување експлицитни снимки поврзани со Пајковиќ и меѓусебните обвинувања за уцена и злоупотреба на приватни содржини. Во меѓувреме, Пајковиќ на 23 јануари 2026 поднела оставка од функцијата генерален директор на Директоратот за унапредување и заштита на човековите права и слободи при Министерството за човекови и малцински права, со образложение „лични причини“.