Ангел во црква во Рим е реставриран за да личи на премиерката Мелони

Ангел во црква во центарот на Рим е реставриран за да личи на италијанската премиерка Џорџија Мелони, објави еден италијански весник, што го натера Министерството за култура да започне истрага, а самата Мелони да го прифати случајот со насмевка.

Весникот „Ла Република“ откри дека еден од двата ангела во капелата на базиликата Сан Лоренцо во Лучина е изменет за да личи на 49-годишната политичарка, првата жена премиер на Италија.

Статијата беше придружена со фотографии од сликата пред и по реставрацијата, со напомена дека ангелот претходно изгледал како „едноставен херувим“.

Министерството за култура соопшти дека му наложило на највисокиот службеник за културно наследство во Рим да ја провери реставрираната слика истиот ден пред „да одлучи кои ќе бидат следните чекори“.

Опозиционото движење Пет ѕвезди се пожали: „Не можеме да дозволиме уметноста и културата да ризикуваат да станат алатка за пропаганда или нешто друго, без разлика дали лицето што е прикажано е лицето на премиерот“.

Парохискиот свештеник Даниеле Мичелети за новинската агенција АНСА изјави дека декорациите во капелата неодамна биле обновени по поплава. Оригиналите датираат само од 2000 година, па затоа не се под заштита на културното наследство.

Реставрацијата ја извршил истиот уметник кој ја создал оригиналната слика, Бруно Валентинети. Тој го оспори тврдењето дека ја изменил сликата, велејќи: „Јас го обновив она што беше таму претходно… пред 25 години“.

Што се однесува до Мелони, таа објави фотографија од контроверзната слика на Инстаграм со натпис: „Не, дефинитивно не изгледам како ангел“ и емотикони за смеење.