Skip to content
Судењето за трагичниот пожар во т.н. кабаре „Пулс“ во Кочани продолжува денеска во судницата во Идризово, каде што, според најавите, треба да сведочат нови пет сведоци на обвинителството – лица што биле во објектот критичната ноќ на 16 март 2025 година, кога загинаа 63 лица, а над 200 беа повредени.
Процесот е во доказна постапка и ова е второ рочиште од почетокот на годината. На претходната расправа, одржана на 26 јануари, четворица сведоци опишале детали за внатрешноста на клубот и за тоа што забележале во однос на мерките за безбедност. Во нивните искази, според прашањата што им биле поставувани, централно место имале условите во објектот и начинот на евакуација кога избувнал пожарот.
Сведоците, според досега изнесеното, тврделе дека во „Пулс“ имало малолетници, како и дека не забележале противпожарни апарати. Дел од нив потврдиле дека зад шанкот постоела уште една врата, но таа не била отворена откако огнот се проширил. Во паниката, како што опишале, единствен излез останал главниот влез, каде што дошло до стампедо и паѓање на луѓе еден врз друг.
Во исказите се отвора и прашањето за институционалната реакција токму во минутите пред трагедијата. Според сведочењата, кратко пред да избувне огнот од пиротехниката што ја користела групата ДНК, во објектот влегла полиција за контрола. Но, забавата не била прекината и, според обвинителството, никој не реагирал да спречи активирање на пиротехниката, која била користена без одобрение од надлежните. Сведоците наведувале и дека вакви „шоу-ефекти“ со запаливи материјали се изведувале и на претходни забави.
Паралелно со главниот судски процес, Основното јавно обвинителство за гонење организиран криминал и корупција поднело три обвиненија против полициски службеници поврзани со случувањата околу „Пулс“, во одделна постапка. Во тие обвиненија, според објавените информации, се опфатени 25 полициски службеници (дел и на раководни позиции), а за седум лица била донесена наредба за запирање на истрагата за дејствија што се однесуваат на периодот 2012–2022 година.
Во главниот предмет, според досега соопштеното, обвинети се 35 физички и три правни лица. А во Општина Кочани, Советот едногласно ја поддржал иницијативата за спомен-обележје „Патека на бесконечноста на 63 ангели“, предложена од Здружението „16 март 2025 Кочани“, кое треба да се гради во Стариот парк, во централното градско подрачје.