Skip to content
По протестите на групи граѓани од ромската заедница, кои реагираа на мерките поврзани со возење без возачка дозвола и одземање возила, на социјалните мрежи се огласи професорката Мирјана Најчевска со порака дека законот мора да важи еднакво за сите – без оглед на тоа дали станува збор за сиромашни или за „нечии деца“ од богати семејства и функционерски кругови.
Таа потсетува дека секое возило е „потенцијално моќно оружје“ и дека како такво треба да биде третирано, бидејќи неодговорното управување може да заврши со тешки повреди или смрт. Во тој контекст, Најчевска вели дека очекува да види кога ќе биде одземен и „џип од некој богатун или функционер чие дете вози без дозвола“, исто како што се постапува и во случаите поврзани со Ромите.
Во нејзината реакција, акцентот е ставен на селективната примена на санкциите: додека дел од граѓаните се соочуваат со строги мерки, години наназад во јавноста се повторуваат примери на дивеење по улиците, минимални казни и неказнивост за оние со влијание. Во истата логика, таа спомнува и феномен на „купени дозволи“, како дополнителен удар врз идејата дека системот е еднаков и правичен.
Наместо мерки што ќе се доживеат како казна за сиромаштијата, Најчевска предлага пристап што комбинира безбедност и социјална реалност: да се даде рок од неколку месеци за регистрација на автомобилите и за полагање возачки испит, а државата да обезбеди финансиска поддршка за оние што немаат средства. Според неа, во процесот треба да се вклучат и невладините организации, со објаснувања и практична поддршка за спроведување на законот без егзистенцијално загрозување на ранливите групи, како и партиите што ја претставуваат ромската заедница, за да се разговара за решенија што нема да го релативизираат еднаквото важење на правилата.