Ако одите на Клинички центар ќе треба да резервирате преку апликација

Ако одите на Клинички центар, за влез и паркирање ќе треба да резервирате преку апликација или, ако не ја користите, на рампата да го скенирате QR-кодот од упатот, најави денес министерот за здравство Азир Алиу за новиот „паметен“ паркинг-систем во кампусот „Мајка Тереза“ во Скопје, кој треба да се надополни со три катни гаражи до јуни.

Проектот, според најавите, треба да донесе повеќе ред и предвидливост во просторот каде што секојдневно се создаваат метеж и застои, особено во периодот од доцно утро до рано попладне. Планот е со катните гаражи и новата организација да се зголеми бројот на места за паркирање и паралелно да се овозможи насочување на возилата кон слободните позиции преку информативни табли и дигитален водич, со сензори на секое паркинг-место и камери со автоматско препознавање на регистарски таблички.

Резервациите, како што е објаснето, ќе функционираат така што пациентите ќе можат од дома да внесат број на упат и да резервираат термин за паркирање, а ако не ја користат апликацијата, ќе можат на самиот влез да го скенираат QR-кодот од упатот за автоматски да им се пресмета тарифата што важи за пациенти. За вработените се предвидува посебна идентификација со QR-код и можност за резервација преку истата апликација, додека за посетители и други граѓани што не доаѓаат како пациенти ќе важи комерцијална цена.

Наплатата, според најавите, ќе се врши онлајн преку апликацијата или на класичен начин, со плаќање во готово или со картичка. Во моделот што го презентираше министерот, онколошките пациенти и натаму би имале бесплатно паркирање, а се најавуваат и одделни цени за пациенти што се лекуваат во комплексот и за вработените, покрај комерцијалната тарифа за останатите корисници. Цените, како што беше посочено, треба да ги утврдат Град Скопје и ЈП „Градски паркинг“ и да поминат низ процедура во Советот на Град Скопје.

Како дел од поширокото уредување, најавени се и хортикултурно средување, пешачки патеки и подобро осветлување, како и посебна „брза лента“ за итна помош, со цел внатрешното движење во кампусот да стане побезбедно и побрзо. За катните гаражи се споменуваат локации во близина на модуларната болница, кај Гинекологија и во делот кај хелиодромот, при што динамиката на поставување треба дополнително да се усогласи меѓу надлежните институции.