Звечкаат со оружје, Русија и Иран со заеднички поморски вежби, додека САД ја концетрира морнарицата во Оманскиот залив

Русија и Иран започнаа заеднички поморски вежби во Оманскиот Залив и северниот Индиски Океан на 19 февруари.

Ова го изјави иранскиот контраадмирал Хасан Максудлу, во услови на растечки тензии околу можна воена акција на САД против Техеран, објави „Киев Индепендент“.

„Главната цел е зајакнување на безбедноста и одржливата поморска соработка“, рече Максудлу. Тој додаде дека вежбите го одразуваат фокусот на двете земји на регионалната ситуација.

Вежбите се одржуваат во контекст на извештаите дека американските вооружени сили распоредиле воени бродови во близина на Иран и се подготвуваат за можни напади. Според Си-Би-Ес, воената акција би можела да започне веќе на 21 февруари, иако американскиот претседател Доналд Трамп не донел конечна одлука.

Руското Министерство за одбрана на 18 февруари објави дека корветата Стојки од Балтичката флота учествувала во заеднички активности со иранските поморски сили пред вежбите.

„Во иранското пристаниште Бандар Абас (на јужниот брег), нашиот екипаж ги надополни своите залихи од гориво, вода и храна, а учествуваше и во заеднички протоколарни настани“, соопшти министерството.

Претходно, помошникот на рускиот претседател Владимир Путин, Николај Патрушев, изјави дека Русија, Иран и Кина распоредиле воени бродови во Ормутскиот теснец за вежби наречени „Појас за безбедност на морето 2026“, осми вакви вежби одржани од 2019 година на иницијатива на Иран.

Овој развој на настаните доаѓа во услови на зголемени тензии додека продолжуваат нуклеарните разговори меѓу Вашингтон и Техеран. Разговорите, одржани на 17 февруари, беа проследени со рок од две недели даден од САД на Иран за да презентира детални предлози.

Си-Ен-Ен претходно објави дека американските сили би можеле да го нападнат иранското раководство, државните институции, нуклеарните постројки и постројките за производство на балистички ракети. Русија и Иран ја продлабочија својата соработка во последниве години, особено за време на војната на Москва против Украина, при што Техеран снабдуваше беспилотни летала и друга воена опрема што ја користат руските сили.