Skip to content
Повеќе од 10.000 граѓанки и граѓани за 48 часа ја потпишале петицијата за воведување електронски нараквици за сторителите на семејно насилство, соопшти Либерално-демократската партија. Од ЛДП бараат Собранието и Владата итно да постапат и да овозможат усвојување на законското решение.
Претседателката на ЛДП и пратеничка Моника Зајкова порача дека поддршката за петицијата е повик до институциите да ја стават безбедноста на жртвите пред партиските интереси.
„Оваа петиција не е само бројка, туку народен ултиматум до Собранието и Владата веднаш да ги сопрат партиските калкулации и без одложување да го изгласаме законското решение за електронско следење на насилниците“, изјави Зајкова.
Таа потсети дека нејзиниот предлог-закон во март бил одбиен по вторпат, а во меѓувреме, како што наведе, се случиле нова трагедија и нова жртва.
Од партијата ги отфрлаат образложенијата за потреба од дополнителни анализи и доработка на решението. Тврдат дека техничката инфраструктура и уредите во системот за пробација веќе постојат, а дека недостига политичка волја за нивно користење во заштитата од семејно насилство.
ЛДП им се заблагодари на потписниците и најави дека ќе продолжи да бара воведување електронско следење. Од партијата порачуваат дека институциите мора навреме да реагираат на ризиците и да обезбедат поефикасна заштита на жртвите.
