Skip to content
Министерството за внатрешни работи (МВР) на Србија издаде соопштение на официјалната веб-страница во кое нагласува „дека државната граница е со Република Северна Македонија целосно обезбедена“. „Генералот на полицијата Драгиша Симиќ, началник на Управата за гранична полиција, заедно со началникот на Одделот за оперативно управување со границите и полицијата за странци при Сојузното министерство за внатрешни работи на Република Австрија, генерал-мајор Бертолд Хубегер, и началникот на Управата за гранична полиција на Националната полиција на Унгарија, потполковник на полицијата Гергељ Цукор, го посетија унгарскиот и австрискиот контингент ангажиран за обезбедување на државната граница на Република Србија и Република Северна Македонија.
Генерал Симиќ, генерал-мајор Хубегер и потполковник Цукор имаа можност сами да се уверат дека државната граница на Србија со Северна Македонија е сеопфатно обезбедена, како и дека движењето на патници и транспортни средства се одвива непречено преку граничните премини.
Тие, исто така, ја видоа подготвеноста и опремата на Управата за гранична полиција на Министерството за внатрешни работи на Република Србија, која располага со најсовремена опрема за следење на државната граница и откривање на сите видови прекуграничен криминал.
Учесниците се согласија дека ова е форма на трилатерална соработка што значително придонесе за намалување на нерегуларната миграција и шверцот на луѓе на западнобалканската миграциска рута, како и дека е во интерес на продолжување на ваквите заеднички активности и дополнително подобрување на меѓународната полициска соработка во други области.
Овој вид соработка се спроведува од 2023 година врз основа на меморандумот за соработка меѓу Република Србија, Република Австрија и Република Унгарија за зајакнување на трилатералната соработка во областа на ефикасна борба против нерегуларната миграција“, се вели во соопштението на Министерството за внатрешни работи на Србија.