Skip to content
Американската влада се спротивстави на планираната аукција на повеќе од 100 предмети извлечени од остатоците на легендарниот брод „Титаник“, покажуваат новообјавени судски документи.
Компанијата RMS Titanic Inc., која има ексклузивни права за истражување и извлекување на предмети од бродоломот на британскиот прекуокеански брод, сака за првпат да продаде дел од својата колекција. Меѓу предметите се наоѓаат лични работи на патници, монети, кујнска опрема и украсни предмети, пренесува CBS.
Во понудата за продажба се споменуваат и бронзена фигура на ангел, златен ѓердан и приврзок во облик на срце, што дополнително ја зголемува вредноста и интересот на колекционерите.
Покрај аукцијата, компанијата планира и меѓународна изложба во четири градови, иако локациите сѐ уште не се официјално објавени.
Американската Национална управа за океани и атмосфера (NOAA) се противи на планот, наведувајќи дека продажбата би ги прекршила претходните судски договори според кои предметите од Титаник треба да останат зачувани како единствена историска целина и да бидат достапни за јавноста преку музејски изложби.
Во судските документи, американската влада истакнува дека компанијата не побарала одобрување од судот, и смета дека такво одобрување е задолжително за ваков вид продажба.
Од друга страна, RMS Titanic Inc. тврди дека планираната аукција не ги крши постојните правни договори и дека има право да располага со дел од предметите.
Од 1987 година, при експедиции до остатоците на бродот се извлечени илјадници артефакти, меѓу кои и делови од трупот на бродот. Досега тие главно биле изложувани, а обидите за продажба често биле блокирани од судови и организации за заштита на културното наследство.
Интересот на колекционерите за предмети поврзани со Титаник останува исклучително висок. Така, златен џебен часовник од 18 карати кој припаѓал на американскиот бизнисмен Исидор Штраус бил продаден за повеќе од два милиони долари, додека виолина за која се верува дека свирела за време на трагедијата достигнала цена од 1,45 милиони долари.
Титаник потона на 15 април 1912 година по удар во санта мраз за време на своето прво патување од Саутемптон кон Њујорк, при што загинаа повеќе од 1.500 луѓе.
Правен експерт од Универзитетот Нортистерн во Бостон наведува дека правилата за заштита на артефактите имаат цел да спречат нивна комерцијализација и претворање во симбол на богатство, истакнувајќи дека тие не смеат да станат предмет за демонстрација на моќ и статус.
