Skip to content
Помладите генерации биолошки стареат побрзо од претходните, што може да доведе до зголемен ризик од развој на тумори во рана возраст, покажува ново истражување на научници од Медицинскиот факултет на Универзитетот Вашингтон во Сент Луис.
Студијата, објавена во научното списание „Nature Medicine“, е предводена од епидемиологот Џин Као и опфаќа податоци од повеќе од 160.000 испитаници од три генерации во САД и Обединетото Кралство.
Истражувачите анализирале специфични биомаркери во крвта и утврдиле дека лицата родени во периодот од 1965 до 1974 година во Обединетото Кралство покажуваат поизразени знаци на системско биолошко стареење во споредба со генерацијата родена од 1950 до 1954 година.
Сличен образец е забележан и во САД, каде што лицата родени меѓу 1990 и 1999 година имаат повисоки нивоа на системско стареење во споредба со генерацијата родена меѓу 1965 и 1969 година.
Според резултатите од студијата, забрзаното биолошко стареење кај помладите испитаници е поврзано со околу 8% поголем ризик од појава на тумори во рана возраст, особено карциноми на белите дробови, дигестивниот систем и матката.
Кога испитаниците биле поделени во три групи според степенот на биолошко стареење, било утврдено дека лицата со најизразени знаци имаат и до 15% поголем ризик од развој на рани тумори во споредба со оние со најниско ниво на стареење.
Научниците дополнително утврдиле дека забрзаното стареење на имунолошкиот систем е поврзано со поголем ризик од рана појава на рак на белите дробови, додека забрзаното стареење на масното ткиво е поврзано со зголемен ризик од колоректален карцином.
