Skip to content
Татко и син се спасени од урнатините на срушена зграда во венецуелската држава Ла Гваира, четири дена откако разорните земјотреси ја погодија земјата. Двајца мажи, видливо исцрпени и со заштитни маски на лицата, беа изнесени на импровизирани носилки, објави Ројтерс.
Ла Гваира е најтешко погодената област по земјотресите во средата, во кои загинаа најмалку 1.450 луѓе, додека илјадници сè уште се водат како исчезнати.
Спасувањето на таткото и синот следеше по 12-часовна сложена операција за време на која тимовите користеа специјализирани камери за пребарување.
Членови на француската цивилна одбрана и американскиот тим за пребарување и спасување од округот Ферфакс, Вирџинија, кои ја извлекоа мајката и нејзиното деветмесечно бебе од урнатините еден ден претходно, учествуваат во спасувачките операции.
Член на француската цивилна заштита изјави дека и таткото и синот биле многу ослабени, откако поминале четири дена под урнатините.
Најмалку 33 лица беа спасени во текот на викендот, но десетици илјади луѓе сè уште се водат како исчезнати.
Експертите предупредуваат дека по 72 часа од земјотресот, шансите за пронаоѓање жив човек под урнатините нагло се намалуваат.
Обединетите нации вчера објавија дека речиси 1.500 згради се оштетени во силните земјотреси што ја погодија северна Венецуела и дека повеќе од 3.100 семејства се раселени.
Според извештајот, земјотресите погодиле најмалку седум федерални држави во Венецуела, а локалните власти пријавиле повеќе од 430 последователни потреси, објави Скај њуз.
Нов земјотрес со јачина од 4,5 степени е регистриран во Јаракуха на север од Венецуела, додека земјотрес со јачина од 4,8 степени претходно е регистриран во Карипското Море, околу 70 километри западно од Каракас.
