Велика Британија ги санкционира руските научници кои го развија Новичок и за хемикалијата со која е убиен Навални

Велика Британија објави санкции против седум руски научници и две истражувачки лаборатории за кои вели дека помогнале во развојот на хемиско оружје што се користело во два напади.

Санкциите се насочени кон поединци и институции вклучени во развојот на нервниот агенс Новичок што се користел во нападот во 2018 година врз поранешен руски шпион кој се криел во Англија, како и за развој на хемикалија за која се верува дека е употребена во труењето на рускиот опозициски лидер Алексеј Навални во Сибир.

„Овие нови мерки се директно насочени кон два водечки истражувачки центри и клучни поединци вклучени во развојот и производството на токсични хемикалии“, соопшти британското Министерство за надворешни работи.

Руските агенти беа обвинети за труење на поранешниот руски шпион Сергеј Скрипал и неговата ќерка во јужниот англиски град Солсбери во март 2018 година со нервниот агенс Новичок, развиен од Советскиот Сојуз.

Нападот во Солсбери, првата офанзивна употреба на хемиско оружје во Европа по Втората светска војна, предизвика меѓународен бес и доведе до масовно протерување на руски дипломати од западните земји.

Скрипал и неговата ќерка преживеаа, но британска државјанка подоцна почина откако нејзиниот партнер пронајде фрлено шише парфем за кое се верува дека е користено за носење Новичок.

Навални, активист против корупцијата кој предводеше стотици илјади луѓе на протест против руското раководство, со години беше најжестокиот домашен противник на претседателот Владимир Путин.

Тој почина во арктичка казнена колонија во февруари 2024 година, додека отслужуваше 19-годишна казна.

„Повторната употреба на хемиско оружје од страна на Русија е флагрантно кршење на меѓународното право и директна закана за глобалната безбедност“, изјави британскиот министер за надворешни работи Ивет Купер.

Санкцираните институции се SC Signal, руски државен истражувачки институт, и GNIII VM, Институтот за истражување и тестирање на воена медицина во Русија.

Санкцираните лица вклучуваат директори и технички специјалисти во двата истражувачки института, соопшти британското Министерство за надворешни работи.

Одлуката беше објавена пред самитот на НАТО во Анкара оваа недела, кој започнува во вторник и се очекува да се фокусира на војната во Украина.

Британското Министерство за надворешни работи соопшти дека од почетокот на војната на Москва во Украина, Велика Британија веќе санкционирала повеќе од 3.400 поединци и субјекти.