Skip to content
Американскиот актер, режисер и продуцент Џорџ Клуни ќе биде награден со „Златен лав“ за животно дело на 83. издание на Меѓународниот филмски фестивал во Венеција.
Одлуката ја донел Управниот одбор на Венецијанското биенале, по предлог на уметничкиот директор на фестивалот Алберто Барбера. Фестивалот ќе се одржува од 2 до 12 септември 2026 година.
Клуни изјави дека Венеција е неговиот омилен филмски фестивал и дека признанието претставува огромна чест за него. Во својот препознатлив стил, тој се пошегува дека наградата веројатно значи и дека остарел, но дека со задоволство ќе ја прифати.
Алберто Барбера го опиша Клуни како целосен и харизматичен автор, кој во себе ги обединува актерството, режијата и продукцијата. Според него, Клуни ја спојува класичната холивудска харизма со професионализам и современа чувствителност, а во текот на кариерата успешно настапувал во драми, трилери, комедии, воени и научнофантастични филмови.
Врската на Клуни со Венецијанскиот фестивал започнала во 1998 година, кога таму бил прикажан филмот „Out of Sight“. Подоцна во Венеција ги претставил и своите режисерски остварувања „Good Night, and Good Luck“, „The Ides of March“ и „Suburbicon“.
На фестивалот биле прикажани и повеќе познати филмови во кои тој настапува, меѓу кои „Michael Clayton“, „Burn After Reading“, „Gravity“, „Wolfs“ и минатогодишниот „Jay Kelly“. Во „Jay Kelly“ Клуни игра филмска ѕвезда која минува низ лична криза пред да прими награда за животно дело на италијански фестивал.
Клуни досега има освоено два Оскара, четири Златни глобуси, награда БАФТА и повеќе признанија од американските актерски и критичарски здруженија. Тој има работено како актер, режисер, сценарист и продуцент, а познат е и по ангажманот во хуманитарни и општествени иницијативи.
Венеција има и лично значење за Клуни. Во 2014 година, токму во овој град, тој се венча со адвокатката Амал Аламудин. Целосната програма на 83. Венецијански филмски фестивал треба да биде објавена подоцна во јули.
