Skip to content
Популарните „гивавеј“ наградни игри на социјалните мрежи повеќе нема да можат да се организираат како досега, само со објава, лајк, тагнување и извлекување добитник. Од 14 јули, со примената на новиот Закон за игрите на среќа и за забавните игри, и овој вид интернет подарувања влегува во законска рамка.
Новите правила предвидуваат секој организатор однапред да обезбеди дозвола од Министерството за финансии. Барањето ќе треба да се поднесе најдоцна 30 дена пред почетокот на наградната игра, заедно со документација за наградите, регистрацијата, финансиската состојба и исполнувањето на законските обврски.
Клучната промена е што „гивавеј“ повеќе нема да се третира како обична промотивна објава, туку како игра во која учесниците стекнуваат можност за награда преку активности на интернет. Во таа категорија влегуваат лајкување, коментирање, тагнување, споделување, објавување содржини или други активности што се користат за промоција на производи и услуги.
Организаторите ќе плаќаат и надоместок за приредување, кој ќе изнесува 18 проценти од вкупната вредност на наградниот фонд. Надоместокот треба да биде платен пред почетокот на играта, во рок од три дена од добивањето на дозволата. Ако не биде уплатен навреме, дозволата ќе биде одземена.
Со ова се менува целата практика на инфлуенсерските и маркетиншките кампањи на Фејсбук, Инстаграм, ТикТок и другите платформи. Компаниите, брендовите, малите бизниси и профилите што досега користеа подарувања за раст на публика ќе мора однапред да подготват правила, да ја пријават играта и јавно да ги објават условите за учество.
Правилата на играта ќе мора да содржат податоци за организаторот, производите или услугите што се промовираат, условите за учество, времетраењето на наградната игра, начинот на избор на добитници, вредноста на наградите, постапката за приговор и ограничувањата за учество. Вработените кај организаторот и нивните најблиски членови на семејството нема да смеат да учествуваат.
Обврска ќе има и по завршувањето на играта. Имињата на добитниците и резултатите ќе мора да бидат објавени најдоцна три дена по извлекувањето или утврдувањето на наградите. Наградите ќе треба да бидат исплатени или преземени во рокот утврден со правилата, но тој рок нема да смее да биде подолг од 60 дена од објавувањето на резултатите.
Законот предвидува еден „гивавеј“ да не може да трае подолго од една година. Со ова државата првпат го дефинира овој вид промотивни интернет наградни игри и ги става во ист систем на контрола како останатите игри што содржат елемент на случајност и награден фонд.
Министерството за финансии претходно соопшти дека новиот закон има цел да воведе појасна и поефикасна регулација, поголема заштита на граѓаните, посилен надзор, намалување на сивата економија и поголема транспарентност во приредувањето игри на среќа и забавни игри.
За дигиталниот маркетинг ова значи крај на импровизираните подарувања без документација. За учесниците значи повеќе јасни правила, јавно објавени услови и поголема сигурност дека наградата навистина ќе биде доделена. За организаторите значи нов административен и финансиски товар кој ќе мора да се пресмета пред секоја кампања.
