Skip to content
Опозициската СДСМ, повикувајќи се на проекциите на Меѓународниот монетарен фонд (ММФ), оцени дека македонската економија во следните пет години ќе бележи послаб раст од повеќето земји во регионот и дека тоа ги демантира, како што наведуваат, тврдењата на премиерот Христијан Мицкоски дека земјата ќе стане „трета економија“ во Европа.
Според СДСМ, ММФ прогнозира просечен економски раст на Северна Македонија од 3 проценти во следните пет години, што, како што тврдат од партијата, е пониско од проекциите за Албанија, Србија, Молдавија, Украина и Косово.
Во партиското соопштение се наведува дека Владата не ги исполнила ветувањата за силен економски раст, инвестициски бум и повисок животен стандард, а како показатели за тоа ги посочуваат падот на странските директни инвестиции во 2025 година за 61 проценти, намалувањето на индустриското производство за 2 проценти во мај и падот на бројот на вработени во индустријата за 2,6 проценти во однос на истиот месец лани.
Од СДСМ тврдат дека граѓаните се соочуваат со висок животен стандард, при што потрошувачката кошничка достигнала речиси 70.000 денари, а ја критикуваат и состојбата со пензискиот систем, јавните финансии и задолжувањето на државата.
Според опозициската партија, новиот ребаланс на Буџетот претставува признание за неуспешните економски политики на Владата, бидејќи, како што наведуваат, се намалуваат средства за поддршка на компаниите, младите и социјално ранливите категории, додека не се намалуваат расходите за, како што велат, „луксузот на власта“.
СДСМ оценува дека со актуелните економски политики државата ризикува дополнително да заостанува зад земјите од регионот и ја повика Владата да преземе мерки за поттикнување на економскиот раст и подобрување на животниот стандард на граѓаните.
