Skip to content
Писателот Владимир Арсенијевиќ објави дека бил претепан утрово во Белград, пред најавената комеморација за жртвите од геноцидот во Сребреница.
Тој објави на Инстаграм видео снимено под Бранковиот мост, каде што денес требаше да се одржи комеморација организирана од граѓанското општество на Србија.
„Утрово, кога дојдов тука, ми пријдоа група од 20-30 луѓе кои ме удираа, ми се заканија со веќе познат речник и го исцртале целиот простор со своите пораки“, рече Арсенијевиќ, чие лице покажува модринки од ударите.
„Бидејќи е небезбедно да се одржи комеморацијата, ја откажуваме, што не значи дека нема да продолжиме да се справуваме со сè со што вообичаено се справуваме“, рече Арсенијевиќ.
Просторот под мостот беше исцртан со шовинистички пораки утрово.
На местото на минатогодишната уметничка и активистичка интервенција во просторот, под Бранковиот мост во Белград, рано утрово осамна Цветот на Сребреница.
„За секоја жртва, за семејството на секоја жртва, за културата на сеќавање, за помирување и за мир. Денес и секој ден: Луѓето се сеќаваат на луѓето. Добро утро, подобар Белград“, порача коалицијата „Народот се сеќава на луѓето“, чии претставници положија голем букет во форма на цвет од Сребреница под мостот.
Денес е Меѓународен ден на сеќавање на жртвите од геноцидот во Сребреница.
Под бело-зелените цвеќиња од икебана, со дијаметар од еден метар, на хартија има натпис „Сребреница 8.372 – Луѓето се сеќаваат на луѓето“.
Коалицијата „Народот се сеќава на луѓето“ е составена од невладини организации, фондации, уметници собрани околу заедничката цел за зачувување на сеќавањето на жртвите од геноцидот во Сребреница.
Тие додадоа дека на овој начин ги повикаа и институциите на Република Србија да го вклучат 11 јули во официјалниот календар на датуми што треба да се слават и со тоа да придонесат за градење траен мир преку негување култура на сеќавање заснована на факти.
