Skip to content
Опозицискиот СДСМ обвини дека застојот во евроинтеграциите има сериозни економски последици и оцени дека Македонија губи пристап до милијарди евра европски средства поради, како што наведува партијата, неуспешната надворешна политика на актуелната власт.
Во партиското соопштение се наведува дека државата останува на маргините на европските процеси во период кога Европската Унија обезбедува значителни финансиски средства за земјите членки и кандидатите за поддршка на инфраструктурата, енергетиката, дигитализацијата и економскиот развој. СДСМ тврди дека одложувањето на преговорите за членство ја намалува можноста Македонија целосно да ги искористи овие фондови.
Од партијата оценуваат дека европската перспектива на државата е „блокирана“, а цената, според нив, ја плаќаат граѓаните преку пропуштени инвестиции, помал економски раст и изгубени можности за развој.
СДСМ ја повика Владата да преземе чекори за деблокирање на европскиот процес и да обезбеди напредок во пристапните преговори, оценувајќи дека тоа е предуслов за поголем пристап до европските финансиски инструменти и инвестиции.
Европската Унија во рамките на Планот за раст за Западен Балкан и други финансиски инструменти обезбедува повеќегодишна финансиска поддршка за земјите од регионот, но користењето на дел од средствата е поврзано со исполнување на договорените реформи и напредокот во евроинтегративниот процес.
