Зошто пилотите на небото пишуваат „Досадно ми е“

Рутинскиот пробен лет на еден млад пилот се претворил во интернет-сензација откако со движењето на авионот на небото ја испишал пораката „Досадно ми е“. Зборовите не можеле да се видат од земјата, но биле забележани на платформата за следење летови „Флајтрадар24“.

Пилотот, инструктор за летање во своите дваесетти години, полетал од Ливерпул со авион „Пајпер томахавк“. Летот траел околу два часа и бил неопходен за тестирање на авионот по замена на еден од цилиндрите.

Над устието на реката Ди, меѓу Англија и Велс, тој поминал околу 20 минути исцртувајќи ја пораката. Летал на височина од приближно 335 метри и со брзина нешто помала од 100 јазли.

Иако маршрутата не била одобрена однапред, компанијата „Рејвенер“ соопштила дека пилотот нема да биде казнет. Оперативниот менаџер Вејн Барет оценил дека станува збор за вешто летање и дека пилотот, и покрај пораката, морал да биде целосно концентриран.

Ова не е прв случај во кој пилот го користи својот лет како огромно платно. Во 2019 година, пилот во Австралија за време на тричасовен тест на нов мотор на радарската мапа ја испишал истата порака.

Пилоти низ светот со своите маршрути цртале срца, елки, авиони, честитки и потписи. Ваквите форми најчесто се создаваат при тестирања или подолги летови во кои авионот мора да остане во воздух одреден период.

Од земјата нема чад ниту видливи букви. „Цртежот“ постои само како линија на дигиталните платформи што ја следат GPS-патеката на авионот.