Skip to content
Управата за јавни приходи испрати персонализирани пораки до повеќе од 35.000 граѓани кои поднеле барање за отворање кориснички профил на системот е-Даночни услуги, но не ја завршиле целосно постапката за регистрација.
Пораките се испратени на електронските адреси што граѓаните ги навеле при започнувањето на регистрацијата. Официјалното известување доаѓа од адресата info@ujp.gov.mk и содржи насоки за следните чекори.
Граѓаните што добиле ваква порака треба лично да се обратат во надлежната канцеларија на УЈП и со себе да понесат важечки документ за идентификација. Овластено службено лице потоа треба да ја провери и одобри регистрацијата на корисничкиот профил.
Известувањето не значи дека граѓаните имаат нова даночна обврска, казна или долг. Станува збор за административна постапка за активирање на профилот на порталот преку кој се користат електронските даночни услуги.
Активниот профил им овозможува на граѓаните да направат увид во Годишната даночна пријава за данок на личен доход, да ги проверат пријавените приходи и да утврдат дали имаат обврска за доплата или побарување за враќање повеќе платен данок.
Преку системот може да се побара и уверение за остварен доход, а податоците што ги води УЈП се користат и од други институции при одлучување за одредени права на граѓаните. Активен профил на е-Даночни услуги е потребен и за користење на апликацијата „МојДДВ“ и скенирање фискални сметки.
Проблемот со незавршените регистрации се појавува во период кога значителен број даночни обврзници сè уште немаат можност електронски да ја прегледаат својата годишна даночна пријава. УЈП за 2025 година генерирала 863.100 пријави, од кои 704.443 биле достапни на активните кориснички профили, додека останатите се однесувале на лица без регистриран профил.
Од пријавите што биле достапни на порталот, 208.857 покажувале износ за доплата, 313.519 побарување поради повеќе платен данок, а 182.067 немале разлика меѓу пресметаниот и платениот данок.
УЈП ги повика граѓаните да ја проверат електронската пошта, вклучително и папките за несакани или промотивни пораки. Поради заштита на личните податоци, корисниците треба да проверат дали испраќачот е официјалната адреса info@ujp.gov.mk и да не доставуваат лозинки или други доверливи податоци преку сомнителни линкови.
За дополнителни информации граѓаните можат да се обратат на електронската адреса info@ujp.gov.mk, на телефонскиот број 02 3253-200 или на бесплатниот број 0800 33 000, кој е достапен за повици од фиксни оператори.
