Skip to content
Повеќе од 770 килограми кокаин биле откриени во пратка со банани во италијанското пристаниште Вадо Лигуре. Дрогата била поделена во 650 пакети, а на дел од нив било отпечатено српското знаме.
Кокаинот бил скриен меѓу десетици палети со банани во разладен контејнер што пристигнал од едно од главните пристаништа во Еквадор.
Пратката ја откриле припадници на Финансиската полиција од Савона, со поддршка од единицата за економски и финансиски криминал од Џенова и царинските службеници од одделот за борба против измами во Лигурија.
Првичната анализа покажала дека станува збор за кокаин со исклучително висока чистота. Вкупната тежина од над 770 килограми е измерена заедно со пакувањето.
На снимката што ја објавила италијанската Финансиска полиција се гледа дека на повеќе пакети има српско знаме. Италијанските власти, сепак, не соопштија дека тоа е доказ дека дрогата била наменета за Србија или дека зад пратката стои криминална група од земјата.
Српското Министерство за внатрешни работи засега не објавило информација за можна поврзаност со случајот. Н1 побарал официјален одговор од српската полиција, но до објавувањето на информацијата не добил одговор.
Италијанските истражители проценуваат дека кокаинот на уличниот пазар можел да достигне вредност од околу 250 милиони евра. Заплената е една од најголемите операции против трговијата со дрога во пристаништето Вадо Лигуре во последните години.
Само три недели претходно, на истото пристаниште биле запленети уште 340 килограми кокаин, скриени во контејнер со банани за готвење што пристигнал од Колумбија. Со двете операции италијанските служби за помалку од еден месец пресекле шверц на повеќе од 1,1 тон кокаин.
Вадо Лигуре станува сè поважна точка на трговските маршрути меѓу Јужна Америка и Европа, но истовремено и привлечна влезна точка за меѓународните мрежи за шверц на дрога.
