Skip to content
Иран упати директно предупредување до Бугарија поради најавеното распоредување на американски воени авиони на нејзина територија. Техеран ѝ порача на Софија дека не смее да дозволи Бугарија да стане база за операции против Иран, објави „Еуроњуз“ .
Предупредувањето се однесува на предлогот на бугарската влада привремено да стационира до осум американски авиони танкери за полнење гориво во воздухопловната база Безмер на југоистокот од земјата.
Портпаролот на иранското Министерство за надворешни работи, Есмаил Багаеи, изјави дека каква било поддршка за американските напади би значело дека Бугарија ќе стане соучесник во она што тој го нарече „агресија и воени злосторства“.
Ова не е прв пат Техеран да испрати таква порака. Во април, Иран испрати дипломатска нота до Софија, предупредувајќи ја Бугарија да не им дозволува на американските воени авиони да ги користат бугарските аеродроми за операции против Иран.
Бугарија и САД ги отфрлија иранските тврдења и нагласија дека распоредувањето на авионот KC-135 е чисто одбранбено по природа и не е поврзано со воените операции на Блискиот Исток. Европската команда на САД соопшти дека внимателно ја следи ситуацијата и е подготвена да одговори на какви било закани.
„Соединетите Американски Држави одржуваат регионални одбранбени капацитети на источното крило на НАТО, вклучувајќи ја и Бугарија, и тесно соработуваат со бугарската влада и нашите сојузници и партнери низ целиот регион. Остануваме будни и подготвени да се соочиме со сите потенцијални закани“, се вели во нивното соопштение.
Бугарското Министерство за надворешни работи, исто така, остро ги отфрли сугестиите дека земјата би можела да се користи за напади врз Иран. „Нема прашање за спроведување на какви било воени операции на Блискиот Исток од бугарска територија“, соопшти министерството.
Бугарската влада додаде дека не презема непријателски чекори кон Техеран. Таа ги повика Иран и САД да ги прекинат воените активности и да се вратат на преговорите за траен прекин на огнот.
