Skip to content
Саудиска Арабија, Турција и Пакистан денеска треба да потпишат заеднички одбранбен договор, со кој трите регионални сили формално ќе ја продлабочат воената соработка во период на силни безбедносни потреси на Блискиот Исток.
За планираното потпишување во Саудиска Арабија за Ројтерс потврдиле два регионални извори директно запознаени со договорот. Деталите за неговиот опфат и конкретните обврски што ќе ги преземат трите држави засега не се објавени.
Договорот не е договорен преку ноќ. Уште во јануари пакистанскиот министер за одбранбено производство Раза Хајат Харај потврди дека по речиси една година разговори е изработен нацрт на тристраниот договор.
„Нацрт-договорот веќе е кај нас“, изјави тогаш Харај, додавајќи дека за негово финализирање е потребен консензус меѓу Исламабад, Ријад и Анкара.
Новата рамка е одделна од Стратешкиот договор за меѓусебна одбрана што Саудиска Арабија и Пакистан го потпишаа во септември 2025 година. Тој предвидува нападот врз една од двете земји да се смета за напад врз двете и дополнително ги зацврсти веќе долгогодишните воени врски меѓу Ријад и Исламабад.
Вклучувањето на Турција му дава поширока тежина на новиот формат. Анкара е членка на НАТО, располага со една од најголемите армии во Алијансата и во последните години значително ја прошири сопствената одбранбена индустрија, додека Пакистан е нуклеарна сила со голема армија. Саудиска Арабија, пак, паралелно ги проширува безбедносните партнерства надвор од традиционалното потпирање на САД. За можноста Турција да се приклучи на нов регионален безбедносен формат се разговара најмалку од почетокот на годинава.
Потпишувањето доаѓа во момент на засилени тензии околу Иран, проблеми со пловидбата низ Ормутскиот Теснец и нестабилност во Црвеното Море, што дополнително ја зголеми потребата на земјите од регионот да градат сопствени механизми за воена и безбедносна соработка.
Засега не е потврдено дали договорот ќе содржи клаузула за автоматска заемна одбрана слична на веќе постојниот договор меѓу Саудиска Арабија и Пакистан.
