Skip to content
Македонскиот јазик не се чува само во учебниците, институциите и свечените говори. Тој живее секој ден, во пораките што ги испраќаме, во зборовите што ги пребаруваме на интернет, во текстовите што ги читаме и во медиумите што ги следиме.
Токму затоа е важно македонскиот јазик да има свое силно место и во дигиталниот свет.
Google неодамна ја прошири можноста корисниците самите да избираат кои медиуми сакаат почесто да ги гледаат меѓу резултатите за актуелни вести. Со функцијата „Preferred Sources“, читателот добива поголема контрола врз тоа од кои извори ќе ги добива информациите што ги пребарува.
За македонските медиуми ова е повеќе од техничка новина.
Тоа е можност македонскиот јазик да биде повидлив таму каде што денес се одвива огромен дел од јавната комуникација, на интернет, во пребарувачите и на мобилните телефони.
Секојпат кога пребаруваме на македонски, кога отвораме текст напишан на кирилица или кога избираме македонски медиум како извор на информации, му даваме дополнителен простор на сопствениот јазик во дигиталниот свет.
А тој простор не се подразбира сам по себе.
Алгоритмите го следат она што го бараме, читаме и споделуваме. Ако постојано пребаруваме со латиница, читаме туѓи медиуми и ги заобиколуваме домашните извори, постепено создаваме интернет во кој македонскиот јазик е сè помалку присутен.
Затоа чувањето на јазикот денес не значи само да знаеме правилно да напишеме реченица.
Значи и да ја вклучиме македонската тастатура на телефонот. Да пребаруваме со кирилица. Да читаме македонски автори. Да следиме домашни медиуми. Да споделуваме содржини напишани на македонски.
Патриотизмот не мора секогаш да биде голем збор.
Понекогаш е едноставно да напишеш „Македонија“, наместо „Makedonija“.
Да напишеш „Какво ќе биде времето утре?“, наместо истото прашање со латинични букви.
Да побараш информација на својот јазик и да му дадеш предност на медиум кој секој ден создава содржина на македонски.
Рацин.мк токму затоа продолжува целата своја содржина да ја создава на македонски јазик и на кирилица, со идеја македонскиот читател да добива вести, анализи, интервјуа и приказни на сопствениот јазик.
Со новата можност на Google, и самите читатели можат да помогнат тие содржини почесто да стигнуваат до нив.
Ако го читате Рацин.мк, можете да го изберете како ваш претпочитан извор на Google. Така, кога пребарувате актуелни теми, Google може почесто да ви ги прикажува текстовите од медиумот што самите сте го избрале.
Но повикот е поширок од еден медиум.
Читајте на македонски. Пишувајте на македонски. Пребарувајте на македонски. Поддржувајте македонска содржина.
Јазикот живее само додека го употребуваме.
А во време кога најголем дел од денот го поминуваме пред екран, неговата иднина во голема мера зависи и од тоа на кој јазик ќе ја напишеме следната порака, следниот коментар или следното пребарување.
Читај и пишувај на македонски јазик!
