Skip to content
Русија е подготвена да разгледа нови американски предлози за прекин на војната во Украина, но тие мора да ја земат предвид состојбата на терен и руските барања, изјави заменик-министерот за надворешни работи Сергеј Рјабков.
Според него, комуникацијата меѓу Москва и Вашингтон продолжува на повеќе нивоа, вклучително и меѓу владините структури и безбедносните служби.
Рјабков оцени дека американската страна во одредени моменти покажала „конструктивен пристап“ и поголемо разбирање за руските позиции, но додаде дека напредокот ќе зависи и од влијанието на Вашингтон врз Киев и европските сојузници.
„Подготвени сме да ги разгледаме новите идеи, но тие мора да ги земат предвид реалностите на терен“, порача рускиот дипломат.
Формалните мировни разговори во последните месеци практично се во застој. Рускиот министер за надворешни работи Сергеј Лавров претходно изјави дека Москва е отворена за нови разговори, но истовремено ги обвини САД дека продолжуваат да и обезбедуваат воена и разузнавачка поддршка на Украина.
Американскиот државен секретар Марко Рубио во јули повтори дека Вашингтон е подготвен да игра конструктивна улога во обидите за завршување на војната, но предупреди дека не очекува брз договор.
Русија во моментов контролира околу една петтина од украинската територија, а Москва инсистира секој мировен договор да ја земе предвид сегашната состојба на фронтот. Украина, пак, останува на ставот дека договор кој би ја легализирал руската окупација е неприфатлив.
Рјабков порача и дека Русија е подготвена да разговара со САД за нуклеарната контрола и по истекот на договорот Нов СТАРТ, под услов Вашингтон исто така да ги почитува претходно утврдените ограничувања.
