Најмалку 35.000 повеќе починати во Европа за време на рекордните горештини

Најмалку 35.000 повеќе луѓе починале во Европа за време на четирите последователни рекордни топлотни бранови ова лето во споредба со бројот што вообичаено би се очекувал, покажуваат прелиминарните податоци од европските земји.

Бројката засега опфаќа едвај половина од континентот и не ги вклучува целосните податоци за август, поради што експертите очекуваат конечниот биланс да биде значително поголем.

Само Германија, Франција и Шпанија досега бележат повеќе од 25.000 дополнителни смртни случаи во периодите на екстремни температури.

Највисока е проценката за Германија, каде Институтот „Роберт Кох“ проценува околу 14.000 смртни случаи поврзани со високите температури во периодот од 6 април до 9 август. Тоа го прави ова лето најтешко за земјата откако се водат вакви податоци.

Во Шпанија системот за мониторинг на Институтот за здравје „Карлос Трети“ проценува дека 4.947 смртни случаи од мај досега можат да се поврзат со високите температури. Со тоа 2026 година веќе го надмина досегашниот шпански рекорд од 2022 година, кога беа регистрирани 4.520 вакви случаи.

Франција, исто така, забележа драматичен раст на смртноста за време на топлотните бранови. Само во периодот од 17 јуни до 2 јули биле регистрирани најмалку 5.764 повеќе смртни случаи од очекуваното, што е раст од 36,2 отсто. Во следниот топлотен бран, од 3 до 22 јули, биле регистрирани уште најмалку 1.243 дополнителни смртни случаи.

Француските здравствени власти нагласуваат дека станува збор за вкупна зголемена смртност во периодите на екстремна жештина, а не за случаи во кои топлотниот удар секогаш е наведен како директна причина за смрт. Конечната проценка за влијанието на горештините ќе биде објавена по завршувањето на летната сезона.

Таквата разлика е важна и за вкупната европска бројка од 35.000. Земјите користат различни методологии, а високите температури често ги влошуваат постојните кардиоваскуларни и респираторни заболувања и можат да доведат до срцев удар, мозочен удар или откажување на бубрезите.

Летото во Европа беше одбележано со четири последователни топлотни бранови и соборување температурни рекорди на стотици метеоролошки станици. Во Германија три дена по ред беа соборувани рекорди на крајот од јуни, а во Шпанија температурите подолг период надминуваа 42 степени. Франција го регистрираше и најтоплиот јули откако започнале мерењата во 1900 година.