Македонија веќе со пет медали во Таранто, Рустемовски брка финале

Македонија стигна до пет медали на Медитеранските игри во Таранто, откако Вероника Консевиќ освои бронза во борење, а боксерот Ален Рустемовски обезбеди најмалку бронзен медал и денеска ќе се бори за пласман во финалето.

Консевиќ го освои бронзениот медал во категоријата до 57 килограми во слободен стил, откако во неизвесна борба ја совлада српската репрезентативка Милица Перовиќ со 7:5 на поени.

Македонската борачка до мечот за бронза стигна преку репасажот. Во четвртфиналето загуби од Шпанката Лидија Перез со 1:4, но откако Перез се пласираше во финалето, Консевиќ доби нова шанса и ја искористи за медал.

Со нејзината бронза, македонското борење има четири медали во Таранто. Претходно Фати Вејсели и Реџеп Хајдари освоија сребро, а Ахмад Магомедов бронза.

Петтиот медал го обезбеди Ален Рустемовски во бокс, во категоријата до 60 килограми. Тој во четвртфиналето го совлада Албанецот Ариол Зенели со технички нокаут во третата рунда и се пласираше во полуфиналето.

Рустемовски денеска од 15 часот ќе боксува против Шпанецот Марин Ернандез. Победа ќе му донесе пласман во големото финале и борба за златниот медал.

Македонските спортисти денеска имаат настапи и во стрелаштво, фудбал, ракомет и одбојка. Анастасија Мојсовска настапува во стрелаштво, фудбалската репрезентација игра против Мароко, ракометарите против Алжир, а одбојкарите против Грција.