Skip to content
Присуство на стаорци во непосредна близина на детско игралиште во скопската општина Кисела Вода предизвика вознемиреност и страв од заразни болести кај локалното население, покажуваат сведоштвата и видеоснимките објавени во граѓанската група „Кисела Вода – Пријави Проблем“. На снимките јасно се забележуваат глодари како слободно се движат низ тревниците и патеките токму на местата каде што секојдневно престојуваат најмладите, што претставува директна закана по јавното здравје.
Родителите и околните станари отворено апелираат до локалната самоуправа и надлежните комунални инспекторати веднаш да излезат на терен и да извршат вонредна дезинсекција и дератизација. Проблемот не е изолиран само на оваа локација, со оглед на тоа што изминативе денови слични поплаки и пријави пристигнуваа и од жителите на населбата Драчево, каде исто така беа забележани глувци и стаорци околу контејнерите и станбените згради.
Појавата на глодари во урбаните зони директно се поврзува со ненавременото празнење на контејнерите, несоодветното одржување на зелените површини и натрупувањето комунален отпад околу садовите за смет. Граѓаните предупредуваат дека со падот на температурите и влажното време глодарите бараат засолништа поблиску до објектите, што значително го зголемува ризикот од нивно влегување во подрумите, влезовите и деловните простории.
