Skip to content
Богато војничко погребување од 6 век пред новата ера, со комплетна воена опрема и предмети од злато, бронза и килибар, открија археолозите на локалитетот Расница кај струшкото село Корошишта. Новото откритие дополнително покажува дека на ова место се наоѓала значајна некропола во која биле погребувани припадници на тогашната елита.
Во гробот археолозите пронашле штит, шлем, копја и меч, како и повеќе предмети изработени од злато, бронза и килибар. Наодите потекнуваат од архајскиот период, односно од 6 век пред новата ера, а според археолозите ќе помогнат подобро да се разберат статусот, идентитетот и воената улога на луѓето кои пред околу 2.600 години живееле во Охридско-струшкиот регион.
Ова не е првото големо откритие во Корошишта. Во 2024 година на истата локација беше откриена монументална гробна целина со околу 80 исклучително вредни предмети, меѓу кои бронзен шлем со златни апликации, бронзен штит, златни прстени и фолии, килибарни и стаклени мониста, сребрени игли и повеќе бронзени садови. Гробницата беше долга околу 7,5 и широка 4,5 метри, а археолозите уште тогаш оценија дека откритието по значење може да се споредува со Требенишката некропола.
Приказната за локалитетот почнала сосема случајно. Во 2020 година, при земјоделски работи на нива, бил пронајден бронзен шлем кој бил предаден во Завод и музеј – Охрид. Археолошките истражувања подоцна покажале дека под земјата се наоѓа цела некропола од архајскиот период.
Особено е значајна близината со Требеништа, познато по богатите гробови и златните погребни маски откриени во минатиот век. Археолошките паралели покажуваат дека слични богати погребувања на локалните елити во истиот период се познати и од Требеништа, Синдос, Архонтико, Ајани и други локалитети на поширокиот простор на Балканот.
Најновите наоди од Корошишта денеска ќе бидат претставени во Охрид од археолошкиот тим предводен од д-р Перо Арџанлиев од Националниот археолошки музеј. Истражувањата се спроведуваат во соработка со Заводот за заштита на спомениците на културата и Музеј – Охрид.
Со второто богато погребување откриено за само две години, Расница сè појасно се оформува како еден од најзначајните новооткриени археолошки комплекси од архајскиот период во Македонија. Новите истражувања треба да дадат повеќе одговори за тоа кои биле луѓето погребани таму и каква била нивната улога во општеството пред повеќе од два и пол милениуми.
