Skip to content
До 18 часот денеска во Македонија се регистрирани 28 пожари на отворен простор, од кои шест сè уште се активни, два се ставени под контрола, а 20 се целосно изгаснати, информира Центарот за управување со кризи (ЦУК).
Најсериозна е состојбата на шест локации, каде што пожарите и натаму се активни.
Во општина Чашка, огнот е во атарот на селото Јаболчиште, на местото „Биков Гроб“, каде што гори букова и дабова шума, кривуљ и ниска вегетација.
Активен пожар има и во општина Липково, кај селото Стрима, на местото „Гури Куќ“, каде што се зафатени борова шума и ниска вегетација.
Во општина Прилеп гори мешана шума кај селото Дрен, додека во општина Ресен пожарот е активен кај автокампот Крани, каде што гори ниска вегетација.
На Шар Планина, во општина Тетово, активен е пожар кај селото Селце, каде што е зафатена мешана шума.
Шестиот активен пожар е во општина Дебар, кај селото Горно Косоврасти, на местата „Крушно и Вложно“, каде што гори шума.
Два пожари се под контрола
ЦУК информира дека два пожари се ставени под контрола.
Во општина Студеничани, пожарот меѓу селата Драчевица и Цветово, на местото „Калдиред“, зафатил ниска вегетација.
Под контрола е и пожарот на депонијата Краста во Куманово.
Во текот на денот се изгаснати уште 20 пожари на отворен простор. Меѓу нив има пожари во скопските општини Гази Баба и Бутел, во Студеничани, Дебар, Дебарца, Новаци, Битола, Тетово, Јегуновце, Теарце, Желино, Неготино, Струмица и Босилово.
Дел од изгаснатите пожари зафатиле ниска вегетација, грмушки и стрништа, но биле регистрирани и пожари на депонии, како и во шумски и пасишни предели.
Според попладневниот извештај на ЦУК, најголемото внимание останува насочено кон шесте активни пожари, особено оние што зафатиле шумска вегетација во повеќе делови од земјата.
