Прокиснува „историската“ спортска сала во Хром

Новата спортска сала во населбата Хром, изградена за 19,7 милиони денари, прокиснува при врнежи од дожд, поради што учениците не ја користат за редовните часови по физичко образование, според информации до кои дојде „Рацин.мк“. За состојбата на салата веќе реагирале и родители до училиштето.

Станува збор за спортската сала на подрачното училиште „Димитар Поп Георгиев – Беровски“ во Хром, во Општина Ѓорче Петров, која беше претставена како значајна инвестиција во подобрувањето на условите за образование и спорт.

На 1 септември годинава, во новата сала се одржал свечениот прием на првачињата. Меѓутоа, според информациите од училиштето, салата не се користи за својата основна намена – редовно одржување на часовите по физичко образование, бидејќи при дожд прокиснува.

Од „историски момент“ до проблеми со покривот

Во септември 2025 година, премиерот Христијан Мицкоски, министерката за образование и наука Весна Јаневска и тогашниот градоначалник на Ѓорче Петров, Александар Стојкоски, ја посетија спортската сала, која во тој период беше во завршна фаза на изградба.

Општината тогаш ја претстави инвестицијата како „историски момент за Хром“, нагласувајќи дека со новиот објект учениците ќе добијат современи услови за спорт и физичко образование.

Но, нешто повеќе од една година по таа посета, се поставува прашањето зошто салата, во која веќе бил организиран училиштен настан, не може редовно да се користи за часовите за кои е изградена.

Договор од 19,7 милиони денари и седум понуди на тендерот

Според документацијата за јавната набавка што ја анализираше „Рацин.мк“, изградбата на спортската сала е договорена преку тендерот со број 12905/2024, објавен од Општина Ѓорче Петров.

Договорот, со број 05-1206/20, е склучен на 10 септември 2024 година со компанијата „Троцкенбауер“ ДООЕЛ Волково, Скопје.

Неговата вредност изнесува 19.730.131 денар со ДДВ, односно приближно 321 илјада евра.

На тендерот пристигнале седум понуди. Избраната понуда изнесувала 16.720.450 денари без ДДВ, додека највисоката понуда достигнала 34.652.014 денари без ДДВ.

Ова била втора постапка за изградба на салата. Претходниот тендер, со број 08087/2024, бил поништен.

Во тендерската документација е наведено дека рокот за изведување на градежните работи е една година од денот на воведувањето на изведувачот во работа.

Договорот, пак, предвидува исплата на извршените работи во месечни рати, најдоцна до декември 2026 година. Овој датум се однесува на договорните обврски и не значи дека изградбата треба да трае до крајот на 2026 година.

Кој е одговорен за отстранување на недостатоците?

Информациите за прокиснувањето отвораат прашања за квалитетот на изведените работи, надзорот врз изградбата и постапката за прием на објектот.

Особено е важно да се утврди дали салата е технички примена, дали се евидентирани недостатоци и дали изведувачот има обврска да ги отстрани.

Тендерската документација предвидува банкарска гаранција за квалитетно и навремено извршување на договорот во висина од пет проценти од неговата вредност. Сепак, од достапните документи не може да се утврди дали таа гаранција сè уште важи, ниту кои гаранциски обврски се применуваат за евентуални недостатоци по завршувањето на изградбата.

За учениците и родителите, суштинското прашање е кога новата спортска сала ќе може редовно да се користи за физичко образование, наместо само за повремени училишни настани.

„Рацин.мк“ ќе продолжи да ја следи состојбата со спортската сала, како и евентуалните мерки за отстранување на пријавените недостатоци.