Парламентот на Украина го усвои законот за легализација на медицинскиот канабис

Врховната Рада, парламентот на Украина, го усвои законот за легализација на медицинскиот канабис, објави Јарослав Железниак, пратеник од парламентарната фракција Холос, пренесува Укринформ.

Тој прецизираше дека 248 пратеници гласале за усвојување на законот „За регулирање на циркулацијата на растенијата канабис за медицински, индустриски цели, истражувачки и научни и технички активности за создавање услови за проширување на пристапот на пациентите до потребниот третман на онколошки заболувања и пост-трауматски стресни нарушувања добиени поради војна“.

Целта на документот е да се прошири пристапот на пациентите до третман со лекови базирани на медицински канабис. Законот дозволува воениот персонал кој страда од ПТСН, анксиозни нарушувања, како и пациенти со епилепсија и рак да се лекуваат со соодветни лекови.

Според законот, се планира да се дозволи развој на нови наркотици или психотропни супстанци од медицински канабис само за нивна употреба за медицински цели или за истражувачки и научни и технички активности.

Здравствените установи од сите облици на сопственост и индивидуалните претприемачи кои имаат лиценца за медицинска пракса ќе имаат можност да купуваат, транспортираат, складираат, издаваат, користат и уништуваат наркотични дроги.

За возврат, активностите кои вклучуваат употреба на наркотични дроги, психотропни супстанции и прекурсори во истражувачки, научни и технички активности и едукативни активности ќе им бидат дозволени на правните лица од сите форми на сопственост доколку имаат лиценца за овој вид дејност во согласност со постапката утврдена од Кабинетот на министри.

Лекарите ќе имаат право да препишуваат лекови со канабис. Ваквите лекови ќе се издаваат само на оние со лекарски рецепт. Освен тоа, луѓето кои имаат рецепт од лекар и документ со кој се потврдува дијагнозата ќе можат да влезат во Украина или да ја напуштат земјата со лекови на база на канабис во мали количини.

Законот ќе стапи на сила шест месеци по неговото објавување.

Документот беше усвоен во прво читање на 13 јули годинава.

Подготви: Ј. Ѓ. Фронтлајн