Намалениот ДДВ за горивата останува 10 отсто до 12 октомври

Намалената стапка на ДДВ за горивата од 10 отсто ќе продолжи да важи до 12 октомври 2026 година, одлучи Владата на денешната седница.

Со одлуката се продолжува примената на мерката со која данокот на додадена вредност за горивата е намален од редовните 18 на 10 отсто.

Од Владата велат дека продолжувањето на повластената даночна стапка има цел да придонесе за стабилност на цените и заштита на животниот стандард на граѓаните.

Мерката беше воведена во услови на зголемени цени на нафтата и нафтените деривати на светските пазари, со цел дел од ценовниот притисок да не се пренесе целосно врз малопродажните цени на горивата.

Владата соопшти дека и во следниот период ќе ги следи движењата на цените и состојбите на пазарот, по што ќе се носат дополнителни одлуки доколку има потреба.

Со продолжувањето на рокот, стапката од 10 отсто ќе остане во сила уште две недели, односно до 12 октомври.

По истекот на рокот ќе биде потребна нова одлука доколку Владата одлучи мерката повторно да биде продолжена.