Skip to content
Возачите од полноќ повторно ќе плаќаат поскапо гориво. Регулаторната комисија за енергетика донесе нова одлука со која бензините поскапуваат за 4,50 денари за литар, а дизелот за дури 6,50 денари. Новите цени ќе важат од 00:01 часот на 18 август.
ЕУРОСУПЕР БС-95 од досегашните 87 денари поскапува на 91,50 денари за литар, додека ЕУРОСУПЕР БС-98 ќе се продава за 93,50 денари. Најголем е ударот кај дизелот, чија цена од 91,50 се зголемува на 98 денари за литар.
Поскапува и екстра лесното масло за домаќинство за 6 денари и неговата нова цена ќе биде 98,50 денари за литар. Мазутот поскапува за 0,188 денари за килограм и ќе чини 43,726 денари.
За просечен резервоар од 50 литри, новата одлука значи околу 225 денари повеќе за бензин и дури 325 денари повеќе за дизел во споредба со цените што важеа изминатата недела.
РКЕ соопшти дека просечното зголемување на малопродажните цени изнесува 4,85 проценти. Причината е растот на референтните цени на светските пазари. Во однос на претходната пресметка, бензините на светските берзи поскапеле во просек за 8,983 проценти, а дизелот за 10,979 проценти.
Новото поскапување доаѓа само една недела откако горивата значително поевтинија. На 10 август бензините беа намалени за четири денари, а дизелот за осум денари за литар. Со денешната одлука, голем дел од тоа поевтинување практично се поништува.
РКЕ нагласува дека утврдените цени се максимални и дека трговците можат да продаваат гориво и по пониски цени. Во пресметката и натаму се применува намалена акциза од два денари за литар кај бензините и четири денари кај дизелот.
