Skip to content
Македонските аеродроми бележат рекорден раст на бројот на патници, но паралелно Скопје останува без три значајни директни авионски врски. По повлекувањето на „Луфтханза“ од линијата Скопје – Франкфурт, од есен исчезнува и директниот лет на „ЛОТ“ за Варшава, а „Изиџет“ ја укинува субвенционираната линија до Париз-Орли.
Најновото кратење доаѓа од полски „ЛОТ“. Според резервациониот систем на компанијата, по 23 октомври нема летови меѓу Скопје и Варшава во зимскиот ред на летање, кој трае до 28 март. Иако веб-страницата на „ЛОТ“ сè уште ја промовира директната врска Скопје – Варшава, достапноста за зимската сезона покажува дека линијата нема да се одржува во тој период.
Ова е поголем проблем од губењето на уште една директна европска дестинација. Варшава е главниот центар на „ЛОТ“, преку кој компанијата нуди поврзување со десетици градови во Европа, Северна Америка и Азија. Со исчезнувањето на директната линија, македонските патници губат уште една практична можност за патување со едно преседнување.
Уште претходно, во мај, „Луфтханза“ ја прекина линијата Скопје – Франкфурт по повеќе од три години летање. Компанијата претходно имаше меѓу седум и десет летови неделно, а во последниот зимски период фреквенцијата беше намалена на три. Како алтернатива, групацијата нуди поврзување преку Виена со „Аустриан ерлајнс“.
Со Франкфурт Македонија не изгуби само директна линија до Германија, туку и пристап до еден од најголемите европски авионски хабови. Слична е ситуацијата и со Варшава, па повлекувањето на две мрежни авиокомпании дополнително ја зголемува зависноста на Скопскиот аеродром од нискобуџетните превозници.
Субвенционираниот Париз-Орли траеше пократко од планираното
Од 24 октомври завршува и директната врска Скопје – Париз-Орли на „Изиџет“. Линијата беше воведена со државна финансиска поддршка и, според договорот со Министерството за транспорт, требаше да се одржува двапати неделно во период од три години, односно до април 2028. Во моментов се реализира само еден лет неделно.
Бидејќи линијата се укинува пред истекот на договорениот период, „Изиџет“ ќе треба да ги врати субвенциите што ги добивала за неа, објави САКАМДАКАЖАМ.МК. Државната поддршка изнесува девет евра за секој патник кој пристигнува во Скопје.
И официјалната страница на „Изиџет“ моментално покажува дека во понудата за Скопје останува директната линија од Женева, додека Париз-Орли веќе не се наведува како актуелна директна опција за наредниот период.
Скопје сепак нема целосно да остане без директен лет до Париз. „Визер“ продолжува да лета до аеродромот Буве, кој се наоѓа значително подалеку од центарот на француската престолнина од Орли.
Рекордни бројки, но каков е квалитетот на поврзаноста?
Парадоксот е што кратењата доаѓаат во година кога македонските аеродроми бележат исклучително силен раст. Според ТАВ Македонија, Скопје и Охрид во првите седум месеци од 2026 година опслужиле повеќе од 2,24 милиони патници, со раст на сообраќајот од 28,4 проценти во однос на истиот период лани.
Владата истовремено ја истакнува политиката на отворање нови линии и субвенционира повеќе дестинации. Но, бројот на патници не е единственото мерило за квалитетот на авионската поврзаност. Разлика има дали еден аеродром нуди десетици евтини директни линии или располага и со силни мрежни авиокомпании преку чии хабови патниците можат да стигнат до стотици други дестинации.
Токму тука е слабата точка на последните кратења. Франкфурт и Варшава беа две важни европски раскрсници, а Париз-Орли беше поудобна директна врска со француската престолнина. Македонија можеби има повеќе патници од кога било, но од есен дел од нив ќе имаат помал избор како да стигнат до Европа и светот.
