Шпаркасе ја презема УНИ Банка, ново окрупнување на банкарскиот пазар

Шпаркасе Банка ја презема УНИ Банка, што отвора нов процес на окрупнување на македонскиот банкарски сектор. Со трансакцијата, австриската банкарска групација што стои зад Шпаркасе дополнително ќе ја зајакне позицијата на пазарот во Македонија.

УНИ Банка во моментов има двајца доминантни акционери, бугарските бизнисмени Цеко Минев и Ивајло Мутафчиев. Секој од нив поседува по 36,45 проценти од акциите, односно заедно контролираат 72,9 проценти од капиталот на банката. Останатите акции се распределени меѓу повеќе помали акционери.

Банката е котирана на Македонската берза и на крајот на 2025 година располагала со вкупна актива од 31,25 милијарди денари. Во истата година остварила нето-добивка од околу 492,5 милиони денари.

Шпаркасе Банка е дел од австриската Steiermärkische Sparkasse, која веќе има значително присуство во Македонија. Според податоците на Erste Group, Шпаркасе има околу 224.000 клиенти, 36 експозитури и пазарен удел од околу 13 проценти.

Ова не е прво големо преземање на Шпаркасе на македонскиот пазар. Во 2019 година Steiermärkische Sparkasse ја презеде Охридска банка од Société Générale, а во јули 2021 година беше завршено нејзиното присоединување кон Шпаркасе Банка. Со таа интеграција Шпаркасе влезе во групата големи банки во Македонија.

Со преземањето на УНИ Банка би следувало уште едно значително зголемување на активата, кредитното портфолио, депозитите и бројот на клиенти на Шпаркасе. Истовремено, бројот на самостојни банкарски брендови на македонскиот пазар дополнително би се намалил.

За реализација на ваква трансакција се потребни регулаторни одобренија, вклучително и од Народната банка, а зависно од структурата на зделката и други надлежни институции. При преземањето на Охридска банка, трансакцијата исто така беше условена со одобренија од домашните и европските регулатори.

Во достапните официјални објави засега нема детални информации за вредноста на трансакцијата, рокот за нејзино завршување и начинот на кој УНИ Банка ќе биде интегрирана во системот на Шпаркасе.

Доколку преземањето биде целосно реализирано, тоа ќе биде едно од позначајните преструктурирања на македонскиот банкарски сектор по присоединувањето на Охридска банка кон Шпаркасе во 2021 година.