Бугарскиот амбасадор во Скопје апелира да не се блокираат граничните премини со Македонија

Амбасадата на Бугарија во Скопје повика на спречување на блокирање на граничните премини и патиштата меѓу Бугарија и Северна Македонија.

Ова е наведено во објава на официјалната Фејсбук страница на дипломатската мисија, потпишана од бугарскиот амбасадор во Северна Македонија, Железко Радуков.

Амбасадата им се заблагодарува на бугарските институции, организации и граѓани за изразената поддршка за мисијата „во сегашните особено тешки услови“.

Оваа објава доаѓа откако беа опожарени два автомобила на бугарската амбасада во Скопјe.

Во исто време, дипломатската мисија на Бугарија во Скопје наведува дека го поддржува „правото на мирен граѓански протест како фундаментално право во секое вистински демократско општество“, но исто така апелира „да не се провоцира блокирање на граничните премини или патиштата меѓу Бугарија и Северна Македонија“.

Според амбасадата, националниот интерес на Бугарија бара земјата да остане отворена за своите југозападни соседи преку промовирање на културна размена, контакти меѓу поделени семејства, како и економска соработка и трговија.

„Ова е најдобриот начин да се спротивставиме на омразата“, истакнува мисијата. Додава дека токму преку одржување на врските меѓу двете општества може да се нагласи блискоста меѓу народите и придобивките и од нивната заедничка историја и од „нашата заедничка иднина во Обединета Европа“.

Во објавата сенагласува дека изразувањето незадоволство и загриженост во врска со настаните во Скопјe треба да има „конструктивен и европски карактер“.

Амбасадата, исто така, испраќа порака до одредени медиуми и јавни личности во Северна Македонија, нарекувајќи ја квалификацијата на бугарските организации како „анти-македонски“ поради различните проценки на билатералните односи и политиките на властите во Скопјe „неоснована и непродуктивна“.

Според дипломатската мисија, плурализмот е суштинска карактеристика на демократијата и нејзината манифестација „не е насочена „против“ никого“, туку има за цел да промовира јавен дијалог и да создаде услови за подобро разбирање меѓу двете земји.

На 17 јуни, како одговор на прашање од БГНЕС, бугарската министерка за надворешни работи Велислава Петрова-Чамова изјави дека иницијативите за блокирање на бугарско-македонската граница се контрапродуктивни и би можеле да ѝ наштетат на позицијата на Бугарија во односите со Северна Македонија.