Skip to content
Американскиот претседател Доналд Трамп ја номинираше Кристи Мекормик за нова амбасадорка на Соединетите Американски Држави во Северна Македонија, соопшти Белата куќа. Мекормик не е кариерна дипломатка, туку правничка и експертка за изборно законодавство, која повеќе од една деценија била членка на федералната Комисија за помош при изборите, а во својата кариера работела и во американската амбасада во Ирак.
Номинацијата е објавена на 9 ноември 2026 година, а за нејзиното именување треба да одлучува американскиот Сенат.
Мекормик била членка на американската Комисија за помош при изборите (Election Assistance Commission – EAC) од декември 2014 до јули 2026 година. Станува збор за независна федерална институција што им обезбедува поддршка на изборните администрации и работи на стандарди за гласачките системи и спроведувањето на изборите.
Во текот на мандатот повеќепати претседавала со Комисијата и учествувала во активности поврзани со изборната безбедност, пристапноста на гласањето и унапредувањето на изборната администрација.
Пред тоа работела во американското Министерство за правда, во Одделот за граѓански права, каде што се занимавала со спроведување на федералните изборни закони и случаи поврзани со дискриминација при гласањето.
Меѓу 2009 и 2010 година била ангажирана во американската амбасада во Багдад, како висок правен советник и вршител на должност заменик-координатор за владеење на правото. Таму работела и на прашања поврзани со изборните процеси во Ирак.
Нејзиното заминување од американската изборна комисија во јули годинава привлече внимание во американските медиуми, во период на политички спорови околу изборните правила и работата на федералните институции.
Мекормик дипломирала на Универзитетот во Бафало, а правното образование го завршила на Универзитетот Џорџ Мејсон.
Иако има меѓународно искуство преку ангажманот во Ирак, Мекормик не доаѓа од редовите на професионалната американска дипломатска служба. Нејзината кариера е првенствено поврзана со правосудството, изборната администрација и владеењето на правото.
Доколку Сенатот ја потврди номинацијата, таа ќе ја преземе функцијата американска амбасадорка во Северна Македонија.
