Филипче: По 25 години, Охридскиот договор треба да биде темел за заедничка иднина

По повод 25 годишнината од потпишувањето на Охридскиот рамковен договор, лидерот на СДСМ, Венко Филипче, порача дека договорот останува важен темел на мирот, соживотот и демократскиот развој на државата. Тој повика различностите да се гледаат како сила, а не како причина за нови политички и меѓуетнички поделби. 

Филипче оцени дека Охридскиот рамковен договор е потсетник дека дијалогот, компромисот и мирното решавање на конфликтите се посилни од поделбите и омразата.

„Охридскиот рамковен договор е потсетник дека мирот, дијалогот и компромисот се секогаш посилни од конфликтот, поделбите и омразата“, порача Филипче. 

Според него, државата треба да биде заеднички дом за сите граѓани, без разлика на нивната етничка припадност, а различностите да претставуваат основа за заедништво наместо за политичко спротивставување.

Филипче истовремено ја критикуваше актуелната власт предводена од ВМРО ДПМНЕ, обвинувајќи ја дека создава политички поделби и атмосфера на страв и омраза. Тој се осврна и на употребата на изразот „талог“ за дел од граѓаните, оценувајќи дека ваквата реторика дополнително ги продлабочува поделбите. 

„Македонија заслужува да биде просперитетна, интегрирана држава, дел од Европа, каде секој граѓанин ќе се чувствува сигурен во сопствената земја. Не со поделби. Не со омраза. Не со етикети како „талог“. Со вистина, со правда и со достоинство“, порача лидерот на СДСМ. 

Охридскиот рамковен договор беше потпишан на 13 август 2001 година, во услови на вооружен конфликт во земјата. Договорот имаше цел да стави крај на конфликтот и да постави рамка за уставни, законски и институционални промени, вклучително и за унапредување на правата на заедниците. 

По 25 години, годишнината повторно го отвора прашањето за тоа колку од заложбите од договорот се реализирани и во која насока треба да се развива државата. На денешните одбележувања беше истакната потребата идниот период да биде насочен кон владеење на правото, еднаквост, квалитет на институциите и европска интеграција. 

Филипче порача дека иднината треба да се гради врз соживот, еднаквост и меѓусебно почитување, наместо врз политички и етнички поделби.