Skip to content
Македонскиот јазик и македонската култура ќе ја збогатат Европската Унија, порача претседателката на Европската комисија, Урсула фон дер Лајен, на денешната прес-конференција со премиерот Христијан Мицкоски во Скопје. Таа нагласи дека Унијата ќе ја пречека Северна Македонија со нејзиниот идентитет и јазик.
„Веруваме дека македонската култура и македонскиот јазик можат да ја направат нашата Унија побогата“, истакна Фон дер Лајен.
Претседателката на ЕК ја поврза оваа порака со европското начело на обединетост во различностите, нагласувајќи дека Унијата сериозно ја сфаќа својата определба да ги прифати различните култури и јазици.
Од прашањето за идентитетот, Фон дер Лајен се осврна на економските придобивки што земјата може да ги почувствува уште пред членството. Зборувајќи за Планот за раст, објасни дека ЕУ носи инвестиции додека Северна Македонија се подготвува за пристапување.
Планот предвидува и отворање делови од европскиот единствен пазар за домашните компании. Паралелно со тоа, земјата треба да ги спроведува реформите што ќе им овозможат на компаниите да работат на тој пазар.
Фон дер Лајен го претстави овој пристап како процес во кој европските инвестиции, пристапот до пазарот и домашните реформи се движат истовремено, во текот на подготовките за членство.
За пристапните преговори, Фон дер Лајен нагласи дека Европската комисија сега се фокусира на деблокирање на процесот. Според неа, по надминувањето на застојот, Северна Македонија би можела брзо да напредува, бидејќи веќе интензивно работи на неопходните реформи. Таа го оцени досегашниот напредок како импресивен, но посочи дека остануваат обврски што земјата треба да ги исполни.
