Skip to content
По тешка ноќ во реонот на Студеничани, рано утрово треба да продолжи интензивното гаснење на пожарот кај Рамни Габер. Според последните информации објавени доцна синоќа, огнот не бил изгаснат, а линијата на пожарот останала долга и тешка за целосно ставање под контрола.
Директорот на Дирекцијата за заштита и спасување, Стојанче Ангелов, синоќа директно од теренот изјави дека пожарот кај Рамни Габер е еден од најтешките со кои службите во моментот се справуваат.
„Пожарот не е изгаснат. Линијата на огнот е доста долга“, изјави Ангелов, додавајќи дека воздушната поддршка во текот на средата значително го забавила ширењето на огнот, но не успеала целосно да го изгасне.
Планот е со разденувањето први повторно да интервенираат противпожарните екипи на земја, а потоа во акцијата да се приклучат и трите „ер трактори“ на Дирекцијата за заштита и спасување. Тие и претходниот ден дејствувале врз пожарната линија и, според Ангелов, значително им ја олесниле работата на пожарникарите.
Во текот на ноќта беше најавено присуство на противпожарни екипи во селото Габер и околните населени места. Директорот на Центарот за управување со кризи, Мухамед Али, синоќа соопшти дека екипите ќе останат на терен со цел да го заштитат селото и да спречат огнот да се приближи кон населените подрачја.
Пожарот се проширил од реонот на селото Моране кон Габер, а во гаснењето биле вклучени припадници на скопската Противпожарна бригада, екипи на ДЗС и четири возила „Пинцгауер“.
Ситуацијата кај Рамни Габер е дел од значително влошената состојба со пожарите низ државата. Само во средата, до 17 часот, Центарот за управување со кризи регистрирал 21 активен пожар на отворен простор – најголем број во еден ден во текот на ова лето.
Токму затоа првите утрински часови ќе бидат клучни за пожарникарите кај Рамни Габер. Пониските температури и раното утринско дејствување вообичаено нудат подобри услови за напад врз огнената линија пред дневното загревање и евентуалното засилување на ветерот.
Според последниот план на ДЗС, најпрво ќе се дејствува од земја, а веднаш штом условите дозволат ќе се вклучат и трите противпожарни авиони. Целта е пожарот што ја одбележа ноќта во Студеничани да биде локализиран пред повторно да добие сила во текот на денот.
