Skip to content
Поранешниот претседател на Косово, Хашим Тачи, е осуден на 25 години затвор со првостепена пресуда на Специјализираните совети на Косово во Хаг. Судот го прогласи за виновен за воени злосторства извршени за време на конфликтот во Косово во 1998 и 1999 година.
Тачи е прогласен за виновен за четири воени злосторства – убиство, тортура, сурово постапување и незаконско лишување од слобода. За дел од останатите точки од обвинението е ослободен бидејќи судскиот совет оценил дека обвинителството не успеало да ги докаже.
Според Ројтерс, судот утврдил негова кривична одговорност за убиствата на 96 лица, меѓу кои политички противници и лица за кои се сметало дека соработуваат со српските безбедносни сили. Тачи во текот на целиот процес ги негираше обвиненијата.
Во истиот предмет се судеше и на поранешните високи функционери на ОВК Кадри Весели, Реџеп Селими и Јакуп Красниќи. Според објавената пресуда што ја пренесува „Независен“, Красниќи добил 25 години затвор, Весели 18, а Селими 13 години.
Обвинителството претходно бараше казни до 45 години затвор за четворицата. Процесот започна во април 2023 година, а во судницата сведочеа повеќе од 130 сведоци. Во постапката учествуваа и 156 жртви.
Тачи е во притвор во Хаг од ноември 2020 година, кога поднесе оставка од функцијата претседател на Косово за да се соочи со обвинението. Првостепената пресуда не значи и крај на постапката, бидејќи страните имаат право на жалба.
