Чекањето три часа за регистрација на ЕEС е системски неуспех

Воведувањето на новиот систем за влез и излез (EES) на Европска унија предизвика сериозни проблеми на аеродромите низ Европа, со долги редици, доцнења и пропуштени летови уште во првите денови од неговата целосна примена.

Системот, кој официјално стапи на сила на 10 април во 29 земји од Шенген зоната, воведува биометриска контрола за патници што не се државјани на ЕУ. Наместо традиционалното печатирање на пасоши, сега се собираат податоци како отпечатоци од прсти, фотографии и информации за влез и излез.

Иако целта е поголема безбедност и подобра контрола на границите, реалноста на теренот покажа спротивна слика. Организациите за аеродроми и авиокомпании предупредуваат дека чекањето од неколку часа не е „привремен проблем“, туку сериозен системски пропуст.

Директорот на европската асоцијација на аеродроми предупреди дека ваквите услови ќе бидат неодржливи, особено во летната сезона кога сообраќајот дополнително ќе се зголеми.

Конкретни случаи веќе ја покажуваат тежината на ситуацијата. На аеродромот Линате во Милано, поради долги редици на граничната контрола, од 156 патници на лет кон Манчестер, само 34 успеале да се качат во авионот, додека останатите останале во Италија.

Авиокомпаниите остро реагираа, оценувајќи дека ситуацијата е „неприфатлива“ и надвор од нивна контрола. Тие бараат од европските институции поголема флексибилност и дури привремено суспендирање на системот во најкритичните периоди.

Од Европска комисија, пак, тврдат дека системот во најголем дел функционира добро и дека регистрацијата на патник трае околу 70 секунди, иако од индустријата предупредуваат дека во пракса може да трае значително подолго.

Дополнителен притисок врз авио-сообраќајот создава и енергетската неизвесност поврзана со Ормуски теснец, што отвора ризик од проблеми со снабдувањето со авионско гориво.

Сето ова доаѓа во пресрет на летната туристичка сезона, кога милиони патници се очекува да патуваат низ Европа – што ја зголемува загриженоста дека хаосот на аеродромите може дополнително да ескалира доколку не се преземат итни мерки.