Skip to content
Русија подготвува нова серија напади и саботажи на европско тло насочени кон медитеранските земји преку лансирање беспилотни летала директно од море, потврдуваат доверливи разузнавачки податоци на американската ЦИА споделени со европските сојузници. Според сознанијата што ги објави шпанскиот весник „Ел Мундо“, оперативниот план на Кремљ предвидува летала од типот „Гербера“ да бидат прошверцувани во стандардни бродски контејнери на комерцијални товарни пловила, од каде што лесно би се лансирале кон крајбрежните цели во Шпанија, Франција и Италија.
Ваквиот тактички потег претставува обид за заобиколување на копнените системи за рано предупредување и директен притисок врз јужното крило на НАТО со цел дестабилизација на европската безбедносна архитектура.
Информацијата следува по доверливата посета на директорот на ЦИА, Џон Ретклиф, на Москва кон крајот на август, по што деталите биле дистрибуирани до министерствата за надворешни работи и за одбрана на европските сојузници. Извори блиски до литванското Министерство за одбрана посочуваат дека криењето лансирни рампи во поморски контејнери е релативно едноставна и тешко забележлива операција во густиот поморски сообраќај на Средоземното Море. Москва со месеци јавно ги означува земјите што испраќаат воена и разузнавачка помош за Украина како легитимни мети, а новиот план претставува чекор напред од претходните копнени саботажи и инциденти забележани во воздушниот простор на Полска и аеродромот во Лајпциг.
Според воените анализи, леталото „Гербера“ претставува помала, поедноставена верзија на добро познатиот дрон „Шахед-136“, со должина од два метри, распон на крилата од два и пол метри и вкупна тежина до 18 килограми. Овој тип дрон достигнува брзина од околу 160 километри на час и поседува оперативен домет до 600 километри, што значи дека при лансирање од меѓународни води на 200 до 300 километри од брегот, целта ја достигнува за помалку од два часа. Бидејќи леталото носи ограничен експлозивен товар, неговата намена не е уништување масивни утврдувања, туку предизвикување локализирани пожари, оштетување критична инфраструктура на отворено и привремено парализирање на клучни поморски пристаништа и цивилни аеродроми.
Покрај физичката штета, европските безбедносни експерти предупредуваат дека примарната цел на ваквата операција е психолошка и економска, со директен обид да се внесе страв кај граѓаните на јужна Европа. Ударите кон комерцијални пристаништа и транспортни јазли во Медитеранот можат да предизвикаат прекини во синџирите на снабдување, поскапување на осигурувањето на поморскиот транспорт и дополнителен трошок за заштита на критичните објекти што на крајот го плаќаат самите потрошувачи. Политичкиот контекст исто така игра огромна улога, со оглед на тоа што Кремљ се обидува да го зголеми притисокот врз јавното мислење пред изборните циклуси во водечките европски држави, каде што растот на несигурноста често се користи за намалување на поддршката за Украина.
