Франција ќе ги заштити кабарето и кан-канот како нематеријално културно наследство

Кабарето и познатиот кан-кан танц, кои стекнаа слава преку париското Мулен Руж, ќе добијат финансиска поддршка благодарение на новите мерки од француското Министерство за култура.

Министерката за култура на Франција, Рашида Дати, објави планови за признавање и заштита на кабарето како значајна форма на уметност. Мерките ги претстави токму од Мулен Руж, легендарниот париски кабаре театар кој се смета за родното место на канкан танцот.

Со буџет од 475.000 евра, мерките имаат за цел да го поддржат креативното изразување, да ја зајакнат видливоста на кабарето и да му дадат заслужено признание како дел од француската културна сцена, изјави Дати.

Средствата ќе бидат распределени на следниов начин:

150.000 евра за поддршка на развојот на „акти“ и „персонажи“.
75.000 евра за „резиденции на кабарето“.
200.000 евра за организирање настани, претстави и подкаст за новата кабаретска сезона.
50.000 евра за истражување и публикации посветени на оваа уметничка форма.

Во Франција постојат околу 200 кабареа кои обезбедуваат 5.000 работни места, од кои 1.600 се изведувачи. Оваа индустрија годишно привлекува околу 2,7 милиони посетители, создавајќи обрт од 225 милиони евра.

Иако кабарето е приватен сектор и не ужива даночни олеснувања за живи изведби, министерката изрази поддршка за негово вклучување во овие бенефиции.

Дополнително, Дати поддржа иницијатива кан-канот танц со високо подигање на нозете – да биде регистриран како нематеријално културно наследство на Франција.

Мулен Руж, кој минатата година го одбележа 135-годишниот јубилеј од своето основање во 1889 година, останува туристичка атракција и дом на некои од најталентираните танчери во светот.

Сопственикот на Мулен Руж, Жан-Виктор Клерико, истакна дека овој план е „пред сè признание“ и додаде дека ќе придонесе за зајакнување на местото на кабарето во француската културна сцена.

Иако Мулен Руж е најпознатото кабаре, Министерството нагласи дека најголемиот дел од кабареата се наоѓаат во рурални области, каде што обезбедуваат уметнички ревии за локалното население и служат како значајни платформи за уметници, особено отворени за ЛГБТ+ заедницата.