Skip to content
Израелскиот министер за дијаспора, Амихај Чикли, го спореди турскиот претседател Реџеп Таип Ердоган со Адолф Хитлер и убиениот лидер на Хамас, Јахја Синвар.
„Сите знаеме како почнуваат и завршуваат нарцисоидните фанатици опседнати со моќ како вас. Еврејскиот народ никогаш не се плашел од обични смртници, од фараонот до денес. Вие сте само патетична, крвава нула што историјата наскоро ќе ја заборави“, напиша Чикли на платформата X.
Години тензии
Во објавата, тој го обвини Ердоган дека е „покровител на Хамас и Исламска држава“ и го опиша како „гротескна комбинација на Хитлер и Синвар“. Заедно со пораката, тој објави фотографија генерирана од вештачка интелигенција, на која се гледа турскиот претседател пред знамињата на Исламска држава и нацистичка Германија.
Изјавата на Чикли дојде како одговор на говорот на Ердоган минатиот месец, во кој тој го нарече ционизмот „геноцидна, окупаторска, експанзионистичка идеологија“ и рече дека борбата против ционизмот е прашање на „колективен опстанок на Турците и турската нација“.
Долгогодишните тензии меѓу Турција и Израел, влошени од војната во Појасот Газа, ескалираа во последните недели. Во исто време, во Израел расте загриженоста за блиските врски на Анкара со Вашингтон и можноста САД да ѝ продадат напредни борбени авиони Ф-35 на Турција.
🇮🇱 ERDOGAN-ISRAEL WAR OF WORDS ERUPTS AS CHIKLI COMPARES TURKISH LEADER TO HITLER AND SINWAR
— Mossad Commentary (@MOSSADil) July 7, 2026
Diaspora Affairs Minister Amichai Chikli slammed Turkish President Erdogan after his latest anti-Israel remarks, calling him a “patron of Hamas and ISIS” and a “grotesque hybrid of… pic.twitter.com/nFATyEMXsl
Непосредно пред изјавата на Чикли, израелскиот премиер Бенјамин Нетанјаху исто така жестоко го нападна Ердоган во интервју за Фокс њуз. „Турција е управувана од човек кој отворено повикува на уништување на Израел и отворено зборува за освојување на Ерусалим“, рече Нетанјаху.
Тој, исто така, предупреди дека Турција не треба да се продава напредно американско оружје, прикажувајќи ја како агресивна држава која не им помогнала на САД за време на конфликтот со Иран. „На режим заразен со Муслиманското братство, екстремистичко движење кое ја мрази Америка и вика „Смрт за Америка“, не треба да му се даваат ниту Ф-35 ниту мотори за нивните борбени авиони“, рече Нетанјаху.
Тој додаде дека таквата продажба би „го нарушила балансот на моќ на Блискиот Исток, кој во крајна линија е загарантиран од израелската воздушна супериорност и американското воено присуство во регионот“.
Израелската влада го признава ерменскиот геноцид
Односите меѓу двете регионални сили беа дополнително влошени со одлуката на израелската влада на 28 јуни да го признае геноцидот врз Ерменците, извршен од Отоманската империја за време и веднаш по Првата светска војна.
Турција го осуди признавањето на ерменскиот геноцид од страна на Израел. Тоа е дипломатски чувствително прашање и покрај Израел, околу триесет други земји, вклучувајќи ги и Соединетите Американски Држави во 2021 година, го признаа овој геноцид.
