Skip to content
Високата претставничка на Европската Унија за надворешна политика, Каја Калас, го осуди рускиот напад со беспилотно летало врз патнички воз во западна Украина, оценувајќи дека целта била да се заплашат европските земји што го поддржуваат Киев.
Нападот се случил во близина на железничката станица Јаходин, непосредно до украинско-полската граница. Беспилотното летало ја погодило локомотивата, но меѓу патниците немало загинати или повредени.
„Мора да покажеме дека не се плашиме“, порача Калас, додавајќи дека европската поддршка за Украина не смее да ослаби поради руските напади.
Непосредно пред ударот, по истата железничка линија поминал посебен воз во кој се наоѓале поранешниот британски премиер Борис Џонсон, поранешниот шведски премиер Карл Билт и повеќе европски дипломати и безбедносни советници. Тие се враќале од конференција одржана во Киев.
Украинската железница ја отвори можноста дека токму возот со европските претставници можел да биде цел на нападот, но засега нема независна потврда за тоа. На станицата во моментот на ударот се наоѓал и друг воз во кој патувал поранешниот директор на ЦИА, Дејвид Петреус.
Русија соопшти дека нејзините сили нападнале железничка инфраструктура во западна Украина, за која тврди дека се користи за транспорт на западна воена помош. Москва не ги коментираше тврдењата дека целта можеле да бидат европските претставници.
Нападот предизвика реакции и од НАТО и од повеќе европски влади. Францускиот министер за надворешни работи Жан-Ноел Баро оцени дека Москва се обидува да ги заплаши и подели Европејците, додека германскиот министер за одбрана Борис Писториус го нарече ударот опасна и намерна ескалација.
Полските власти дополнително ја засилија безбедноста долж границата, бидејќи нападот се случил во непосредна близина на територијата на Полска, членка на Европската Унија и НАТО.
