Сопственикот на барот од трагедијата во Кран-Монтана уапсен за семејно насилство

Жак Морети, сопственикот на барот „Ле Констелејшн“ во швајцарскиот ски-центар Кран-Монтана, е во притвор поради сомнение дека физички ја нападнал својата сопруга Џесика Морети. Инцидентот е одвоен од истрагата за новогодишниот пожар во нивниот локал, во кој загинаа 41 лице, а 115 беа повредени.

Според швајцарската телевизија „Леман Блу“, нападот се случил ноќта меѓу 11 и 12 август во нивниот дом во кантонот Вале. Џесика Морети била повредена и морала да биде пренесена во болница, а Жак Морети потоа бил приведен и му бил определен притвор.

Засега не се објавени детали за околностите во кои се случил инцидентот, ниту за точната правна квалификација на делото. Не е познато ниту дали Џесика Морети сè уште се наоѓа во болница. Морети се смета за невин додека не биде донесена правосилна судска одлука.

Адвокатите на брачната двојка потврдија дека е отворена посебна постапка, но одбија да навлегуваат во детали, оценувајќи дека станува збор за настан од нивниот приватен живот. Тие нагласија дека овој случај не треба да се меша со истрагата за пожарот во Кран-Монтана.

Жак и Џесика Морети истовремено се меѓу 16-те осомничени во истрагата за пожарот во „Ле Констелејшн“ на 1 јануари годинава. Против нив се води постапка за дела поврзани со смрт и повреди од небрежност и предизвикување пожар од небрежност.

Во трагедијата загинаа 41 лице, меѓу кои голем број млади, а уште 115 беа повредени. Истрагата за причините за пожарот и безбедносните пропусти во објектот продолжува паралелно со новата постапка против Морети.