Skip to content
Иако се очекува првиот транзит на сурова нафта во Европа преку украинскиот дел од нафтоводот „Дружба“, конфликтите на руско-украинскиот фронт не стивнуваат. Зеленски вели дека Киев е подготвен за обновување на трилатералните преговори со Соединетите Американски Држави и Русија за завршување на војната. По рускиот напад врз градот Днепар, избувна пожар во станбена зграда, а седум лица беа повредени. Едно лице беше убиено во украински напад со беспилотни летала врз рускиот регион Самара.
Украинскиот претседател Володимир Зеленски денес изјави дека војната во Иран го одвлекла вниманието од руската агресија врз неговата земја, предупредувајќи дека е „голем ризик“ да се верува дека напорите за завршување на војната во Украина не можат да продолжат сè додека не заврши конфликтот во Иран.
Во интервју за Си-Ен-Ен, Зеленски рече дека техничките разговори со Соединетите Американски Држави сè уште се во тек, но дека не гледа можност за лична средба сè додека „не се затвори прашањето за Иран“.
Тој истакна дека е предизвик што истиот американски преговарачки тим, предводен од претставникот Стив Виткоф и Џаред Кушнер, учествува во преговорите и за војната во Иран и за Украина.
Зеленски нагласи дека, иако разбира дека САД во моментов се фокусирани на војната во Иран, Украина не смее да се занемари, бидејќи борбите сè уште продолжуваат.
„Не е опција да се каже дека ќе разговараме за Украина подоцна. Украина не е „подоцна“. Украина веќе е во голема трагедија и мора да бараме решение во исто време“, рече тој.
Украинскиот претседател, исто така, изјави дека војната влијае на испораките на клучно оружје, особено антибалистички ракети, нагласувајќи дека Украина не добива доволни количини поради ограничените производствени капацитети во САД.
Зборувајќи за финансиската помош од Европската Унија, Зеленски рече дека одобрениот заем од 90 милијарди евра е прашање на „живот и опстанок“ за Украина, нагласувајќи дека без овие средства земјата не може да произведе доволни количини оружје за одбрана.
Едно лице е убиено во напад на украински дрон врз индустриски објекти во областа Самара, на југозапад од Русија, во текот на изминатата ноќ, изјави денес гувернерот на тој регион, Вјачеслав Федоришев.
„Во Новокујбишевск, како резултат на нападот врз индустриски објекти, според прелиминарните извештаи, има жртви. Едно лице загина“, изјави гувернерот во објава на платформата Max, пренесува РИА Новости.
Гувернерот додаде дека украинските напади со беспилотни летала врз тој регион продолжуваат. На лице место е формиран центар за итни интервенции.
Во рускиот напад на Днепар синоќа, две лица загинаа, а осум се повредени, изјави денес Олександар Гања, началник на воената администрација на Ѓепропетровск.
„Две лица загинаа, осум се повредени. Бројот на жртви од рускиот ноќен напад врз Днепар е зголемен. Едно лице сè уште е исчезнато“, рече Ганџа во објава на Телеграм, пренесува Укринформ.
Нападите на руските трупи по должината на реката Днепар предизвикаа пожари на неколку локации, а оштетени се и станбени згради.
Техничките детали за испорака на руска нафта до Европа преку нафтоводот Дружба моментално се дискутираат на корпоративно ниво, изјави денес портпаролот на Кремљ, Дмитриј Песков, истакнувајќи дека унгарската нафтена компанија МОЛ е исто така вклучена во тие дискусии.
„Контактите се воспоставуваат преку корпоративни канали. МОЛ е исто така вклучен. Не ги знам деталите, тоа е повеќе корпоративно прашање“, рече Песков, како што објави Известија.
Тој рече дека комуникацијата меѓу Москва и Будимпешта ќе продолжи „доколку Унгарија продолжи да зазема прагматична позиција“.
Претходно денес, унгарската нафтена група МОЛ соопшти дека била известена од Укртранснафта, украинскиот оператор на нафтоводот Дружба, дека денес напладне почнала да прима сурова нафта од Белорусија преку цевководниот систем Дружба.
„МОЛ очекува првите пратки сурова нафта по рестартирањето на украинскиот дел од цевководниот систем да пристигнат во Унгарија и Словачка најдоцна утре“, според соопштението на МОЛ.
Украинскиот претседател Володимир Зеленски во вторник изјави дека Украина го поправила оштетениот нафтовод Дружба што транспортира руска нафта во Европа и е подготвена да ги продолжи испораките, деблокирајќи ја последната пречка за обезбедување десетици милијарди евра поддршка од Брисел.
Унгарскиот премиер во заминување, Виктор Орбан, го блокираше заемот од 90 милијарди евра за Украина како средство за притисок врз Киев да ги продолжи испораките, обвинувајќи го за одложување на поправките на цевководите.