Ангелов ги откри причините за катастрофалниот пожар кај Исарот во Штип

Стојанче Ангелов ги откри можните причини за катастрофалниот пожар кај Исарот во Штип, но нагласи дека во овој момент сè уште постојат неколку шпекулации и нејаснотии околу тоа како точно избувнал огнот. Според него, надлежните работат на прецизирање на причинителите за пожарите во штипско и пробиштипско, кои предизвикаа сериозна загриженост кај граѓаните.

Ангелов посочи дека за пожарот кај Исарот постојат индиции дека можеби настанал при чистење двор кај една од куќите во близина. Но, истовремено, како што рече, има и други индиции според кои пожарот можеби бил предизвикан од допирање на лабави електрични жици меѓу две бандери.

Тој нагласи дека причините допрва треба прецизно да се утврдат, но ја искористи изјавата за да упати силен апел до граѓаните во текот на летото да не палат оган на отворен простор. Ангелов предупреди дека секое палење, без разлика дали е за чистење двор, стрниште, пасиште, правење скара или друг мотив, може да предизвика пожар со катастрофални последици.

Според него, токму пожарот кај Исарот е пример колку брзо една невнимателност или технички проблем може да се претвори во сериозна опасност. Затоа апелираше до граѓаните да бидат внимателни и да не ризикуваат со оган на отворено во летниот период, кога високите температури и сувата вегетација го зголемуваат ризикот од ширење пожари.